Kaxa Kaladze – Güclü yağış nəticəsində bir neçə küçəni su basıb, infrastrukturla bağlı müəyyən problemlər yaranıb, bütün çatışmazlıqlar aradan qaldırılacaq

Kaxa Kaladze: Güclü yağış nəticəsində bir neçə küçəni su basıb, yaranan bütün problemlər aradan qaldırılacaq

Güclü yağış nəticəsində bir neçə küçənin su altında qalması sakinlər üçün müəyyən çətinliklər yaradıb. Bu barədə Tbilisi meri Kaxa Kaladze paytaxt hökumətinin iclasında bildirib.

Merin sözlərinə görə, əlverişsiz hava şəraiti nəticəsində yaranan problemlərlə bağlı bələdiyyənin bütün aidiyyəti xidmətləri və rayon icra nümayəndəliklərinin əməkdaşları hadisə yerlərinə cəlb olunub, sakinlərlə əlaqə saxlanılıb və zəruri tədbirlər görülüb.

Kaxa Kaladze qeyd edib ki, yağıntılar infrastruktur sahəsində də müəyyən problemlər yaradıb. Onun sözlərinə görə, bütün çatışmazlıqlar aradan qaldırılacaq və vəziyyət tam bərpa olunacaq.

Tbilisi meri küçələrin su altında qalmasının əsas səbəblərinə də toxunub. O bildirib ki, problemlər əsasən yağış-kanalizasiya xətlərinin qırılmış ağac budaqları, yarpaqlar və məişət tullantıları ilə tutulması, eləcə də bəzi ərazilərdə drenaj sisteminin olmaması və ya köhnəlməsi ilə bağlıdır.

Kaladzenin sözlərinə görə, 2017-ci ildən etibarən şəhərdə hər hansı küçə və ya prospektin yenidən qurulmasına başlanarkən ilk növbədə yeraltı kommunikasiya xətləri yenilənir.

Mer vurğulayıb ki, şəhər üzrə yeraltı kommunikasiyaların infrastrukturu baxımından ciddi problemlər mövcuddur. Buna görə də tikinti və bərpa işləri aparılan ərazilərdə ilk mərhələdə yeraltı şəbəkələr dəyişdirilir və müasirləşdirilir.

Kaxa Kaladze əlavə edib ki, bütün problemləri eyni vaxtda həll etmək mümkün olmasa da, mərhələli şəkildə şəhərdə mövcud infrastruktur çatışmazlıqları tam aradan qaldırılacaq.