Gürcüstan prezidenti Mixeil Ğavelaşvili Ermənistan Respublikasının xarici işlər naziri Ararat Mirzoyan ilə görüşüb.

Görüşdə tərəflər iki ölkə arasında mövcud siyasi, iqtisadi, mədəni və təhsil əlaqələri və ikitərəfli əməkdaşlığın dərinləşdirilməsinin gələcək perspektivlərini müzakirə ediblər. Söhbət zamanı Ermənistan prezidentinin yaxın gələcəkdə Gürcüstana planlaşdırılan səfərinə toxunulub.

Görüşdə 2024-cü ildə imzalanmış Strateji Tərəfdaşlıq Sazişinin möhkəm dostluq əlaqələrinin daha bir təsdiqi olduğu və bütün sahələrdə daha dərin və hərtərəfli əməkdaşlığa yol açdığı vurğulanıb. Həmçinin vurğulanıb ki, dünyada mövcud gərgin geosiyasi vəziyyət fonunda Gürcüstan və Ermənistan siyasi, iqtisadi və xalqlararası əlaqələri inkişaf etdirməkdə davam edir.

Gürcüstan prezidentinin Ermənistan Respublikasının xarici işlər naziri ilə görüşündə qeyd etdiyi kimi, Gürcüstan Ermənistan və Azərbaycan arasında sülh sazişinin paraflanmasını qeyd-şərtsiz təqdir edir.

“Ümid edirik ki, yaxın gələcəkdə Ermənistan və Azərbaycan sülh sazişinə yekun imza atacaq, bu isə Cənubi Qafqazın müsbət inkişaf dinamikasını keyfiyyətcə yeni mərhələyə çıxaracaq və regionun cəlbediciliyini artıracaq. Gürcüstan Cənubi Qafqazda sülh və sabitliyin təmin olunmasını davamlı dəstəkləyir və ehtiyac olduqda öz töhfəsini verməyə davam etməyə hazırdır”, – deyə Mixeil Ğavelaşvili qeyd edib.

Gürcüstan Prezidenti Ermənistan Respublikasının xarici işlər nazirinə Gürcüstanın suverenliyi və ərazi bütövlüyünə verdiyi dəstəyə görə təşəkkür edib və qeyd edib ki, Gürcüstan Ermənistan Respublikasının suverenliyini və ərazi bütövlüyünü qeyd-şərtsiz dəstəkləyir.

Görüş Prezident sarayında keçirilib.

Məlumatı Gürcüstan Prezidentinin Administrasiyası yayır.