Noyabrın 26-da Avropa İttifaqı Xarici İşlər Nazirləri Şurası Ukrayna ilə bağlı “sülh planı”nı müzakirə etmək üçün iclas keçirəcək. Bu barədə “Europaevskaya Pravda” yazır.

Yüksək vəzifəli şəxslərdən birinin bildirdiyinə görə, iclası Avropa İttifaqının Xarici İşlər və Təhlükəsizlik Siyasəti üzrə Ali Nümayəndəsi Kaia Kalas çağırıb.

“Avropa İttifaqının Ali Nümayəndəsi bu çərşənbə günü Avropa İttifaqı Xarici İşlər Nazirləri Şurasını Ukrayna üçün sülh planının hazırlanmasını və bu prosesdə Aİ-nin rolunu müzakirə etməyə dəvət edir”, – mənbə bildirib.

Yüksək rütbəli rəsmi şəxs həmçinin, görüşün distant rejimdə keçiriləcəyini qeyd edib.

Xatırladaq ki, ötən həftə ABŞ Rusiya-Ukrayna müharibəsinə son qoymaq üçün 28 bəndlik “sülh planı”nı açıqlamışdı. Noyabrın 23-də ABŞ, Ukrayna və Avropa ölkələrinin nümayəndələri Cenevrədə görüşərək planın yeni variantını təqdim ediblər.