Yaponiya Ukrayna Prezidentini Xirosimada keçiriləcək G7 sammitinə dəvət etməyi planlaşdırır. Bu barədə yapon mediası məlumat yayır. Mayın 19-21-də keçirilməsi planlaşdırılan G7 sammitinin builki sədri məhz Yaponiyadır.

“Nikkei”nin yazdığı kimi, Baş nazir Fumio Kişida ölkədəki mövcud vəziyyət haqqında məlumatı şəxsən Volodimir Zelenskidən eşitmək istəyir. Həmçinin ərzaq və enerji təhlükəsizliyi məsələlərinin müzakirəsi də planlaşdırılır.

Nəşr onu da qeyd edir ki, G7-nin Ukrayna ilə bağlı razılaşdırılmış hərəkətləri Tayvanla bağlı münaqişəyə cəlb oluna biləcək Yaponiya üçün vacib məsələdir. Yaponiya hakimiyyətində Çinlə münaqişə halında, Rusiyanın Ukraynaya təcavüzündən sonra Moskva ilə olduğu kimi, ABŞ və Avropa ilə təcili və sərt reaksiyaya ehtiyacın olduğunu hesab edirlər.