Əgər iranlı həmkarları ilə birbaşa əlaqə qurmaq imkanı yaranarsa, ABŞ buna açıq olacaq, – bu barədə ABŞ Dövlət Katibi Marko Rubio bildirib.

Rubionun bildirdiyinə görə, ABŞ-ın xüsusi nümayəndəsi Stiv Uitkoff İran tərəfi ilə görüşməyə hazırdır. Lakin, onun dediyinə görə, ABŞ İranla razılığa gələ bilməyə bilər.

“İranlılar görüşmək istəsələr, biz hazırıq. Onlar görüşüb danışmaq istədiklərini bildiriblər. Əgər fikirlərini dəyişsələr, biz də buna razılaşacağıq. Amma biz görüşməyə və danışmağa üstünlük veririk. Bu oğlanlarla razılığa gələcəyimizə əmin deyiləm, amma bunu anlamağa çalışacağıq. Nəyinsə edilə biləcəyini öyrənməkdə heç bir zərər görmürük. Bu, hər hansı bir münaqişəyə və ya hər hansı bir çağırışa qarşı həmişə dinc nəticəyə üstünlük verən prezidentdir”, – deyə ABŞ dövlət katibi bildirib.

Bununla yanaşı, Marko Rubionun dediyinə görə, danışıqların real nəticə verməsi üçün tərəflər İranın nüvə proqramından başqa, ballistik raketlər, region üzrə terror təşkilatlarının maliyyələşdirilməsi və İran xalqına münasibət məsələlərini də müzakirə etməlidirlər.

Məlumat üçün bildirək ki, ABŞ və İran arasında danışıqların 6 fevralda Omanda keçirilməsi ehtimal edilir. “Axios”un məlumatına görə, Tramp administrasiyası İranın xahişi ilə razılaşıb və danışıqlar Türkiyə əvəzinə Omanda keçiriləcək. Yayılan məlumata görə, regiondakı digər ölkələrin Omanda planlaşdırılan danışıqlara qoşulub-qoşulmayacağı ilə bağlı danışıqlar aparılır.