Malayziyada, Borneo adasında yanğın nəticəsində ən azı 1000 ev məhv olub və minlərlə insan evlərini tərk etməyə məcbur olub.

Medianın məlumatına görə, yanğın bazar günü səhər saatlarında Sabah əyalətinin dənizkənarı kəndlərindən birində baş verib.

“Güclü külək və evlərin bir-birinə yaxın olması yanğının sürətlə yayılmasına səbəb olub”, – Ştatın yanğınsöndürmə və xilasetmə xidmətinin rəhbəri Cimmi Laqunqa bildirib.

“Reuters” agentliyinin yazdığına görə, yanğının yayılmasına evlərin tamamilə ağacdan tikilmiş olması da səbəb olub. Bununla yanaşı, kənd ölkənin ən kasıb icmalarından biridir və burada təhlükəsizlik tədbirlərinə əməl edilməyib.

Polisin məlumatına görə, yanğın nəticəsində 9000-dən çox sakin zərər çəkib. Həlak olanlar barədə məlumat yayılmayıb.