Maka Boçorişvili – Biz ABŞ ilə siyasi dialoqu davam etdirməyə tam hazırıq və ABŞ-dan da eyni şeyi gözləyirik

Biz ABŞ ilə siyasi dialoqu davam etdirməyə tam hazırıq və ABŞ-dan da eyni şeyi gözləyirik, – bu barədə Gürcüstanın Baş nazirin müavini, xarici işlər naziri Maka Boçorişvili „Dğis Kronika“ verilişində bildirib.

Boçorişvilinin bildirdiyinə görə, ABŞ-ın Gürcüstandakı müvəqqəti işlər vəkili Emi Diazın təyin olunmasından sonra keçirilən ilk görüşdə tərəflər Gürcüstan-ABŞ münasibətlərinin gündəliyini müzakirə ediblər.

Onun qiymətləndirməsinə görə, son aylarda münasibətlərin sağlamlaşdırılması istiqamətində müsbət əlamətlər müşahidə olunub və bu, Vaşinqton tərəfindən həyata keçirilən, Gürcüstan tərəfinə öz mövqelərini təqdim etmək imkanı verən fəallıqlarla müşayiət olunur.

“Son aylarda münasibətlərimizin sağlamlaşdırılması istiqamətində müsbət əlamətlər var. Amerika Birləşmiş Ştatları ilə münasibətlərdən nə gözlədiyimizə dair mövqeyimizi dəfələrlə ifadə etmişik. Arzumuz budur ki, bu münasibətlər qarşılıqlı hörmətə əsaslansın, sağlam olsun və strateji tərəfdaşlığımız real məzmun kəsb etsin. Əlbəttə ki, biz Amerika tərəfi ilə bu istiqamətdə işləməyə davam edəcəyik“, – Boçorişvili qeyd edib.

Onun bildirdiyinə görə, hər iki tərəf strateji tərəfdaşlığın yeni mərhələsinin „təmiz səhifədən“ başlamalı olduğu barədə razılığa gəlir.

“Hər iki tərəf strateji tərəfdaşlıq barədə danışmağa təmiz səhifədən başlamalı olduğumuz fikrini bölüşür. Həmçinin hesab edirik və bu fikri ABŞ tərəfi ilə də bölüşürük ki, strateji tərəfdaşlığımız konkret məzmun kəsb etməlidir. Həmin məzmunun necə və nədən ibarət olacağı isə diplomatik fəaliyyətin və siyasi dialoqun mövzusudur”, – Boçorişvili bildirib.

Nazir həmçinin qeyd edib ki, Gürcüstan ABŞ ilə siyasi dialoqu davam etdirməyə tam hazırdır və Tbilisi Amerika tərəfindən də oxşar hazırlıq gözləyir.