Biz Avropa İttifaqı ilə münasibətləri qiymətləndiririk, lakin son dövrdə Gürcüstana qarşı mövcud yanaşmalar qəbuledilməzdir, – bu barədə Gürcüstanın xarici işlər naziri Maka Boçorişvili bildirib.

Onun sözlərinə görə, Avropa İttifaqının yanlış siyasi istiqaməti birbaşa Avropanın özünə və onun maraqlarına zərər verir.

“Biz dəfələrlə Avropa İttifaqının strukturlarında gedən proseslər və çox tez-tez Avropanın öz maraqlarından kənara çıxan mövqelər haqqında danışmışıq. Əlbəttə ki, Gürcüstanın Avropa İttifaqı ilə münasibətlərdə marağı var. İllər ərzində formalaşmış münasibətləri qiymətləndiririk. Lakin Avropa İttifaqı bürokratiyasının son dövrdə Gürcüstana yönəlik göstərdiyi yanaşmalar qəbuledilməzdir. Bunlar bu gün gördüyümüz səhv siyasətin nəticələridir. İkili standartlar, səhv siyasi addımlar, ilk növbədə, Avropanın nüfuzuna xələl gətirir. Əgər bu gün bu barədə açıq şəkildə danışırlarsa, deməli, söhbət təkcə Gürcüstan və onun hakimiyyətindən getmir, həm də başqalarından gedir. Digərləri də aydın şəkildə görürlər ki, Avropa İttifaqının siyasətinin həyata keçirildiyi səhv siyasi istiqamətlər Avropaya və onun maraqlarına zərər verir”, – Boçorişvili bildirib.