Livan hakimiyyətinin bildirdiyinə görə, İsrailin həyata keçirdiyi hava hücumları nəticəsində azı 39 nəfər həlak olub. Cavab olaraq “Hizbullah” qruplaşması İsrailin şimalına və Livanın cənubunda yerləşən İsrail hərbçilərinə tərəf raketlər və dronlar buraxıb.

İsrail hava hücumlarının əksəriyyəti Livanın cənubunda həyata keçirilib. İsrail hərbçilərinin bəyanatına görə, zərbələr infrastrukturun və İran tərəfindən dəstəklənən silahlı qruplaşma ilə əlaqəli şəxslərin hədəf alınmasına yönəlib.

Məlumat üçün bildirək ki, ABŞ Prezidentinin 16 aprel tarixində İsrail və Livan hökumətləri arasında atəşkəs razılaşması barədə bəyanatından sonra belə, İsrail və “Hizbullah” hücumları davam etdirir.

Livan Səhiyyə Nazirliyinin göstəricilərinə görə, ən ağır zərbələrdən biri ölkənin cənubunda, Sayda yaxınlığında yerləşən Ayn əl-Delb bölgəsinə həyata keçirilib, burada yaşayış binaları dağılıb və onlarla insan dağıntılar altında qalıb.

Yerli hakimiyyətin məlumatına görə, İsrail və “Hizbullah” arasında hərbi gərginliyin başlamasından bəri Livanda 2795 nəfər həlak olub.

Cavab olaraq, “Hizbullah” İsrailin şimalına dronla hücum həyata keçirib. İsrail hərbçilərinin məlumatına görə, nəticədə üç əsgər xəsarət alıb.