Latviyanın Elektron Media üzrə Milli Şurası “Dozhd” teleşirkətinin lisenziyasını ləğv edib

Latviyanın Elektron Media üzrə Milli Şurası rus teleşirkəti “Dozhd”un lisenziyasını ləğv edib. Bu barədə Latviyanın İctimai Yayımçısı Latviyanın Elektron Media üzrə Milli Şurasının sədri İvars Abolinşə istinadən məlumat yayır.

Lisenziyanın ləğv edilməsinə səbəb olaraq milli təhlükəsizliyə və ictimai asayişə təhdid göstərilir.

“Dozhd” teleşirkəti dekabrın 8-dən Latviyada yayımını dayandıracaq. Latviyanın Elektron Media üzrə Milli Şurasında “Dozhd” teleşirkətinin rəhbərliyinin istər fərdi pozuntuların, istərsə də qanun pozuntularının birgə mahiyyət və ağırlığını dərk etmədiyini bildiriblər. Latviyanın Elektron Media üzrə Milli Şurasının sədri İvars Abolinşin “Twitter” sosial şəbəkəsində yazdığı kimi, hər kəs Latviya qanunvericiliyinə əməl etməli və hörmət etməlidir.

Bundan əvvəl şuranın “Dozhd” teleşirkətini Krımın Rusiya ərazisi kimi qeyd olunduğu xəritəyə, eləcə də aparıcının Rusiya ordusundan “bizim ordu” kimi bəhs etdiyi materiala və rus çağırışçılara yardım haqqında danışdığına görə cərimələdiyi məlum oldu.

Belə ki, aparıcı Aleksei Korosteliov tamaşaçıları televiziya şirkətinə səfərbərlik zamanı mümkün pozuntular, həmçinin Rusiya ordusunun hərbi cinayətləri barədə məlumat verməyə çağırıb.

“Ümid edirik ki, bir çox hərbi qulluqçuya, məsələn, cəbhədə avadanlıq və əsas ehtiyaclarla kömək edə bilmişik” – deyə aparıcı efirdə bildirib.

Dekabrın 2-də teleşirkət Korosteliovla əməkdaşlığı dayandırdığını açıqlayıb və efirdə səsləndirilmiş ifadələrə görə üzr istəyib.