ABŞ prezidentinin xüsusi nümayəndəsi Kit Kelloqun dediyinə görə, Ukraynanın təhlükəsizlik zəmanətləri ilə bağlı danışıqlar çətin keçir.

Kelloq bu barədə Kiyevdə ukraynalı jurnalistlərlə söhbətində bildirib.

Onun dediyinə görə, diplomatik cəbhədə çox çətin iş gedir. Bu baxımdan Kelloq həm Alyaskada Donald Tramp və Vladimir Putinin danışıqlarının əhəmiyyətindən, həm də eyni kontekstdə Avropa liderləri və Volodimir Zelenskinin ABŞ prezidentilə görüşündən danışıb.

“Siz görürsünüz, üzərində çalışdığımız proses necə sürətlə irəliləyir. Ümid edirik ki, təhlükəsizlik zəmanətlərini əldə edə biləcəyimiz bir vəziyyətə çatacağıq. Bu iş hələ də davam edir”, – Kelloq bildirib.

Kit Kelloq yenidən müharibəni bitirməyin zəruriliyindən danışdı.

“Siz istəyirsiniz ki, bunu sonadək çatdırın, ədalətli və məntiqli nəticəyə gətirin. Gələn il, Ukraynanın Müstəqillik Günündə ehtimal ki, bu artıq əldə olunacaq, hər şey fərqli olacaq, Ukrayna başqa ölkə olacaq və biz hamımızın oynaya biləcəyi hər hansı bir rolun çox vacib olduğunu düşünürəm”, – Kelloq bildirib.