Dövlət Xidmətlərinin İnkişafı Agentliyi bəyanat yayır.

Bəyanatda qeyd edildiyi kimi, onlarla Gürcüstan vətəndaşının yeni pasportlarındakı qüsur səbəbindən sərhəddən geri qaytarılması barədə məlumat həqiqətə uyğun deyil.

Bununla yanaşı, agentlik fərdi halların digər qurumlarla birlikdə araşdırıldığını bildirir.

“Dövlət Xidmətlərinin İnkişafı Agentliyi onlarla Gürcüstan vətəndaşının yeni pasportlarındakı qüsur səbəbindən sərhəddən geri qaytarılması barədə yayılmış məlumata münasibət bildirir. Vurğulayırıq ki, bu, həqiqətə uyğun deyil, pasportların keyfiyyəti ilə bağlı heç bir risk mövcud deyil və vətəndaşlar bu səbəbdən hərəkət etməkdə problem yaşamayacaqlar.

Agentlik digər qurumlarla birlikdə bildirilən konkret fərdi halları araşdırır və zərurət yarandıqda müvafiq tədbirlər görəcək.

Dövlət Xidmətlərinin İnkişafı Agentliyi iş prosesi çərçivəsində verdiyi sənədlərin monitorinqini mütəmadi olaraq həyata keçirir. Proses zamanı və ya sonrakı mərhələdə hər hansı bir ehtiyac aşkar edildiyi təqdirdə, Agentlik həm sənədlərin dəqiqliyini və təhlükəsizliyini, həm də vətəndaşların maraqlarının qorunmasını təmin etmək üçün hər bir vətəndaşla fərdi olaraq əlaqə saxlayır.

Monitorinq və profilaktik tədbirlər çərçivəsində, müəyyən edilmiş ehtiyaca uyğun olaraq, agentlik məlumatların dəqiqləşdirilməsi məqsədilə vətəndaşlarla fərdi qaydada əlaqə saxlayıb və onlara sənədlərin həmin gün tamamilə ödənişsiz şəkildə dəyişdirilməsini təklif edib.

Qeyd olunan təcrübə sənəd idarəetməsi və təhlükəsizliyi üçün müəyyən edilmiş beynəlxalq standartlara tam uyğundur və keyfiyyətin təmin edilməsi prosesinin tərkib hissəsidir. Bu yanaşma xidmətin keyfiyyətini davamlı olaraq artırmağı və vətəndaşlara etibarlı, yüksək standartlı xidmətlər göstərmək məqsədi daşıyır. Dövlət Xidmətlərinin İnkişafı Agentliyi vətəndaşlara əməkdaşlıqlarına görə təşəkkür edir”, – deyə bəyanatda deyilib.