Bu gün Cenevrədə Birləşmiş Millətlər Təşkilatının Universal Dövri İcmalının (UPR) IV dövrü çərçivəsində Gürcüstanda insan haqlarının vəziyyəti ilə bağlı Gürcüstanın Milli Hesabatının (2021–2025) təqdimatı keçiriləcək.

Gürcüstan Xarici İşlər Nazirliyinin məlumatına görə, qeyd olunan müzakirədə Gürcüstan xarici işlər nazirinin müavini Xatuna Totladzenin rəhbərlik etdiyi Gürcüstan hökumət nümayəndə heyəti iştirak edəcək. Nümayəndə heyətinə dövlət qurumlarının, Gürcüstan Parlamentinin, Gürcüstan Mərkəzi Seçki Komissiyasının, Gürcüstan Prokurorluğunun, Gürcüstan Ali Ədliyyə Şurasının və Gürcüstanın ümumi məhkəmələr sisteminin nümayəndələri daxildir.

“Gürcüstanın milli hesabatı Xarici İşlər Nazirliyinin koordinasiyası ilə, bütün müvafiq dövlət qurumlarının iştirakı ilə hazırlanıb və ona həm icraedici, həm qanunverici, həm də məhkəmə hakimiyyəti daxil idi.

Hesabata 2021-ci ildə Gürcüstan tərəfindən əvvəlki dövr çərçivəsində dəstəklənmiş tövsiyələrin icrası barədə məlumat əlavə olunur. Qeyd etmək lazımdır ki, 3-cü dövr çərçivəsində Gürcüstan 285 tövsiyə alıb və 257 tövsiyəni dəstəkləyib.

Hesabat Xarici İşlər Nazirliyi tərəfindən təklif və rəylərini bölüşmək məqsədilə Xalq Müdafiəçisi aparatına təqdim edilib. Bununla yanaşı, qeyd etmək lazımdır ki, Gürcüstan Parlamentinin Nizamnaməsində 2016-cı ildə edilən dəyişikliklərə əsasən, hesabat hökumətin təqdimatı ilə Gürcüstan Parlamentində də müzakirə olunub.

Hesabatın müzakirəsindən sonra Gürcüstan müəyyən edilmiş müddətlər ərzində hansı tövsiyələrlə razılaşacağını bildirərək mövqeyini təqdim etməli və növbəti 5 il ərzində onları həyata keçirməyi öhdəsinə götürməlidir.

Qeyd etmək lazımdır ki, Birləşmiş Millətlər Təşkilatının İnsan Hüquqları Şurası tərəfindən yaradılan Universal Dövri İcmal, BMT-nin İnsan Hüquqları Şurasının unikal mexanizmidir və bu mexanizm çərçivəsində BMT-nin üzv dövlətində insan hüquqlarının qorunması ilə bağlı mövcud vəziyyət hər 4-5 ildən bir müzakirə olunur”, – Gürcüstan Xarici İşlər Nazirliyinin məlumatında qeyd olunur.