ABŞ prezidenti İrana qarşı davam edən müharibənin ərəb ölkələri tərəfindən maliyyələşdirilməsində maraqlıdır, – bu barədə Ağ Evin mətbuat katibi Kerolayn Levitt jurnalistlərlə söhbətində bildirib.

Levittdən Donald Trampın ərəb ölkələrini ABŞ-ın İrandakı hərbi əməliyyatını maliyyələşdirməyə çağırmaqda maraqlı olub-olmadığı soruşulub. Levitt isə hadisələrə qabaqcadan müdaxilə etmək istəmədiyini, lakin Trampın belə bir ideyası olduğunu qeyd edib.

“Bilirəm ki, onun bu ideyası var və siz bu barədə ondan daha çox şey eşidəcəksiniz”, – deyə o qeyd edib.

Levittə müharibənin müddəti barədə də sual ünvanlanıb. Onun dediyinə görə, prezident əvvəldən bildirib ki, İrandakı əməliyyat təxminən dörd-altı həftə davam edəcək.

“Bu gün otuzuncu gündür. Beləliklə, Pentaqonun Epik Qəzəb Əməliyyatının məqsədlərinə tam çatmaq üçün nə qədər vaxt qaldığını hesablayın”, – Levitt bildirib.