Kaxa Kaladze – Avropa bürokratiyasının Gürcüstan əhalisini vizasız gediş-gəliş məsələsi ilə daim şantaj etməsi qəti şəkildə qəbuledilməzdir

Avropa bürokratiyasının viza liberallaşdırılması və vizasız gediş-gəliş məsələsindən istifadə edərək Gürcüstan əhalisini daim şantaj etməsi qətiyyən qəbuledilməzdir, – bu barədə Tbilisi meri Kaxa Kaladze jurnalistlərə bildirib.

Onun sözlərinə görə, bu yanaşma gürcü xalqının müstəqil qərarlar qəbul etməsini bağışlaya bilməmələri ilə izah olunur.

“Dünyada bizdən daha çox, daha böyük iqtisadiyyata malik bir çox millət və ölkə var. Təxminən dörd milyon əhalisi olan Gürcüstan həqiqətən də öz xarakteri ilə seçilən və xüsusi bir ölkədir. Təəssüf ki, bunu avropalıların heç biri dərk edə bilməyib. Bunun izahı odur ki, gürcü xalqının qərarları müstəqil şəkildə qəbul etməsini, ölkə üçün ən vacib və əhəmiyyətli hesab etdiyimiz addımları atmağımızı və heç kimə Gürcüstandan öz maraqlarını həyata keçirmək üçün istifadə etmək imkanı verməməyimizi bizə bağışlaya bilmirlər”, – Kaxa Kaladze bildirib.