Kaia Kalas – Avropa İttifaqı Azərbaycan və Ermənistanın davamlı və dayanıqlı sülhün əldə olunmasına yönəlmiş səylərini dəstəkləyir

Avropa İttifaqı Azərbaycan və Ermənistanın davamlı və dayanıqlı sülhün əldə olunmasına yönəlmiş səylərini dəstəkləyir, – Azərbaycan mediasının məlumatına görə, bu barədə Avropa İttifaqının xarici işlər və təhlükəsizlik siyasəti məsələləri üzrə ali nümayəndəsi Kaia Kalas Bakıda səfəri zamanı keçirdiyi mətbuat konfransında bildirib.

Onun söylədiyinə görə, Azərbaycan Avropa İttifaqı üçün dəyərli enerji tərəfdaşıdır.

“Avropa İttifaqı davamlı və dayanıqlı sülhün əldə olunmasına yönəlmiş səylərini dəstəkləyir. Ermənistan və Azərbaycanın indi belə bir imkanı var. Mən sülh sazişinin mətni üzrə əldə olunan razılaşmanı təqdir edirəm və növbəti addımları səbirsizliklə gözləyirəm”, – Kalas bildirib.

Bununla yanaşı, Kalas qeyd edib ki, Avropa İttifaqı Azərbaycanın Ukraynaya göstərdiyi humanitar dəstəyi təqdir edir.

“Azərbaycan bölgədə mühüm tərəfdaşdır. Bu, Avropa İttifaqı üçün dəyərli enerji tərəfdaşıdır və biz birlikdə əlaqələrimizin möhkəmləndirilməsində mühüm irəliləyiş əldə etmişik. Siz Avropa İttifaqına enerji təchizatı mənbələrini şaxələndirməyə və dünyanın görünməmiş çağırışlarla üzləşdiyi bir vaxtda enerji təhlükəsizliyimizi gücləndirməyə kömək etdiniz. Biz həmçinin Azərbaycanın Ukraynaya göstərdiyi humanitar yardıma və keçən il COP29 iqlim sammitinə ev sahibliyi etməklə nümayiş etdirdiyi liderliyə görə minnətdarıq. Bu cür çoxtərəfli səylər göstərir ki, ölkələr birgə hərəkət etməklə qlobal proseslərə real təsir göstərə bilər”, – Kalas bildirib.