İtaliya Qrenlandiya ətrafında gərginliyin artması fonunda NATO-nu Arktikada koordinasiya etməyə çağırır. İtaliyanın Baş naziri Corcia Meloni NATO-nu gərginliyin qarşısını almaq və “digər aktyorların müdaxiləsinə” cavab vermək üçün Arktika bölgəsində “koordinasiyalı iştirak” yaratmağa çağırıb.

İtaliya hökumətinin Arktika haqqında hazırladığı sənədin təqdimatında Meloni bildirib ki, region yeni dəniz marşrutlarının inkişafı və böyük “enerji və mineral resurslar” səbəbindən getdikcə daha vacib hala gəlir.

Məlumat üçün bildirək ki,İtaliya 2013-cü ildən Arktika Şurasında müşahidəçi statusu ilə iştirak edir və son dövrlərdə ABŞ ilə Danimarka arasında Qrenlandiya ilə bağlı gərginlik fonunda öz siyasətini yeniləyib.

“Biz Arktika Şurasında müşahidəçi ölkəyik və BMT-nin Dəniz Hüququ Konvensiyasından başlayaraq beynəlxalq hüququ həmişə dəstəkləmişik”, – deyə Meloni bildirib.

İtaliya hökuməti tərəfindən hazırlanan sənəd Rusiyanın Arktikaya artan marağına, o cümlədən bölgədəki hərbi mövcudluğunun artmasına diqqət yetirir.

Sənəddə həmçinin Çinin Arktikadakı rolunu artırmaq cəhdləri qeyd olunur. Bu, Pekinin Şimali Dəniz Yolu ilə daşımalara olan marağının artmasını və Moskva ilə dərinləşən əlaqələri, o cümlədən hərbi sahədəki əməkdaşlığı əhatə edir.