İsrailin məhkəməsi ölkədə davam edən ümumi tətilin dayandırılması barədə fərman verib

 
İsrail mediası yazır ki, hakimin qərarına əsasən, “HƏMAS” tərəfindən qaçırılan girovların azad edilməsi haqqında razılaşmanın bağlanması tələbi ilə davam edən tətil yerli vaxtla bu gün saat 18:00-da dayandırılmalıdır. Medianın yazdığı kimi, məhkəmə ümumi tətilin siyasi xarakter daşıdığını müəyyən edib.

Xatırladaq ki, sentyabrın 2-də səhərdən İsraildə ümumi tətil başlayıb. Aksiyanın iştirakçılarının əsas tələbi İsrail hökumətinin girovları azad etmək üçün Qəzza sektorunda atəşkəs haqqında razılaşmaya razılıq verməsidir. Qəzza sektorunda İsrail ordusunun “HƏMAS” tərəfindən qaçırılan 6 girovun cəsədini tapması məlum olduqdan sonra tətilin keçirilməsi haqqında qərarı həmkarlar ittifaqları sentyabrın 1-də qəbul ediblər. Tətildə səhiyyə müəssisələrinin, iaşə obyektlərinin və hərbi sənayenin nümayəndələri, eləcə də ticarət şəbəkələrinin bir hissəsi iştirak edir. İctimai nəqliyyat da işləmir.

Hazırda Təl-Əviv və İsrailin bir sıra digər şəhərlərində etiraz aksiyaları keçirilir.