İsrail Müdafiə Qüvvələri bildirirlər ki, Qəzzada atəşkəs razılaşması qüvvəyə minib
İsrail Müdafiə Qüvvələri Qəzzada atəşkəs razılaşmasının qüvvəyə mindiyini bildirib.
Onların məlumatına görə, yerli vaxtla saat 12:00-dan etibarən qoşunlar “yenilənmiş yerləşmə xətləri üzrə mövqelərin tutulmasına başlayıblar”.
“İsrail Müdafiə Qüvvələrinin Cənub Komandanlığının qoşunları bölgəyə yerləşdirilib və istənilən təhlükəni aradan qaldırmağa davam edəcək”, – İsrail Müdafiə Qüvvələrinin bəyanatında qeyd olunub.
Məlumat üçün bildirək ki, İsrail hökuməti bundan əvvəl Qəzzada atəşkəs və girovların azad edilməsi planını təsdiqlədi. “HƏMAS” bütün israilli girovları azad edəcək. İsrail hökumətinin məlumatına görə, bu, bazar və ya bazar ertəsi baş verə bilər.
Bütün girovlar “HƏMAS” tərəfdən azad edilən kimi, İsrail ömürlük həbs cəzasına məhkum edilmiş və İsrail həbsxanalarında saxlanılan 250 fələstinli məhbusu, eləcə də 7 oktyabrdan sonra saxlanılan Qəzza zolağının 1700 sakinini azad edəcək. Həmçinin, hər iki tərəfin məlumatına görə, Qəzzaya daxil olan humanitar yardım gündə 600 yük maşınına qədər artırılacaq.