İranın xarici işlər naziri Abbas Əraqçi bildirib ki, Tehran ABŞ-ın nüvə təklifinə tezliklə cavab verəcək. O, bu barədə Misirə səfəri zamanı bildirib.

ABŞ-ın yeni nüvə sazişi təklifini şənbə günü Tehranda səfərdə olan Omanın xarici işlər naziri Seyid Bədr Əlbusaidi İrana təqdim edib.

“Biz tezliklə müvafiq cavab verəcəyik. Cavab İran İslam Respublikasının prinsiplərinə, İran xalqının milli maraqlarına və hüquqlarına əsaslanır”, – deyə xarici işlər naziri deyib.

Anonim mənbə “Reuters” agentliyinə bildirib ki, İran ABŞ-ın təklifinə mənfi cavab verəcək. Tehranda düşünürlər ki, bu təklif perspektivsizdir və onların maraqlarını nəzərə almır.

Xatırladaq ki, Donald Trampın əsas tələbi İranın nüvə silahına malik olmamasıdır. Tramp Ağ Evə qayıtdıqdan sonra aprel ayında İran və ABŞ Omanın vasitəçiliyi ilə danışıqlara başlayıb.