İranda bildirirlər ki, ABŞ-ın zərbələrinə cavab olaraq, Küveyt və Bəhreyndəki Amerika hərbi obyektlərinə hücum ediblər – “Razılaşmanın pozulması bütün diplomatik proseslərin dayandırılmasına səbəb olacaq”

İran Xarici İşlər Nazirliyində bildirirlər ki, ABŞ aviasiyası cənub sahilində yerləşən bir neçə müşahidə və monitorinq obyektinə zərbə endirib və bu, onların dediyinə görə, razılaşma şərtlərinin pozulmasıdır.

“Bu qəddar hücumlar ABŞ-ın öz öhdəliklərinə və məsuliyyətlərinə əhəmiyyət vermədiyini göstərir. Vədləri pozmaq onların təbiətinin bir hissəsidir”, – İran Xarici İşlər Nazirliyinin bəyanatında deyilib.

Bununla yanaşı, İran İslam İnqilabı Keşikçiləri Korpusunda Küveyt və Bəhreyndə yerləşən Amerika hərbi obyektlərinə zərbələr endirdiklərini bildiriblər.

Onların məlumatına görə, əməliyyat ABŞ-ın İrana qarşı həyata keçirdiyi son zərbələrə cavab idi.

“Atəşkəs müqaviləsinin pozulması Qarşılıqlı Anlaşma Memorandumunun birinci bəndinə ziddir və bütün diplomatik proseslərin tamamilə dayandırılmasına səbəb olacaq”, – bəyanatda deyilib.

Məlumat üçün bildirək ki, ABŞ prezidenti Donald Tramp bir az əvvəl İranın növbəti dəfə atəşkəs müqaviləsini pozduğunu və bunun ABŞ-ın İranın raket və PUA anbarlarına zərbələr endirməsinə səbəb olduğunu bildirib.