İrakli Kobaxidze Gürcüstan hökumətinin maliyyə dəstəyi ilə yay düşərgəsində istirahət edən ukraynalı uşaqlarla görüşüb

Gürcüstanın Baş naziri İrakli Kobaxidze Ətraf Mühit və Kənd Təsərrüfatı naziri David Sonğulaşvili, Təhsil, Elm və Gənclər nazirinin birinci müavini Levan Ğirsiaşvili və Xarici İşlər nazirinin birinci müavini Qiorqi Zurabaşvili ilə birlikdə Gürcüstan hökumətinin maliyyə dəstəyi ilə yay düşərgəsində istirahət edən ukraynalı uşaqlarla görüşüb.

İrakli Kobaxidze uşaqları nahar yeməyində qonaq edib.

Gürcüstanın Baş nazirinin mətbuat xidmətinin məlumatına görə, ilk mərhələdə düşərgənin qonaqları Kiyevdən olan silahlı qüvvələrin xidmətçilərinin övladları, müharibə nəticəsində yetim qalmış uşaqlar və onları müşayiət edən şəxslərdir, onlar 10 gün ərzində mədəni-tanışlıq və əyləncəli tədbirlərdə iştirak edirlər. Düşərgənin qonaqları üçün həmçinin Tbilisi, Bodbe, Siğnaği və Telavidə ekskursiyalar təşkil olunacaq.

4-15 iyul tarixlərində düşərgə ikinci qrupu – Sumıdən olan Milli Qvardiya hərbi qulluqçularının övladlarını qəbul edəcək.