Gürcüstanın Baş naziri İrakli Kobaxidze Türkiyə Respublikasının Prezidenti Rəcəb Tayyib Ərdoğan ilə görüşüb.

Gürcüstan hökumətinin məlumatına görə, görüşdə Gürcüstan və Türkiyə arasında strateji tərəfdaşlıq, müxtəlif sahələrdə uğurlu əməkdaşlıq və regionda cari hadisələr müzakirə olunub.

Hökumət başçısı aprelin 15-də Türkiyədə məktəbdə baş vermiş atışma nəticəsində baş verən faciə ilə bağlı Prezident Ərdoğana başsağlığı verib.

“Görüş zamanı ticarət-iqtisadi əməkdaşlığın müsbət dinamikasına və birgə regional layihələrin roluna xüsusi diqqət yetirildi. Bununla yanaşı, Bakı–Tbilisi–Qars dəmir yolunun, Bakı–Tbilisi–Ceyhan neft kəmərinin, Bakı–Tbilisi–Ərzurum qaz kəmərinin və Cənub Qaz Dəhlizinin həm regionun Avropa ilə əlaqələndirilməsi, həm də Avropanın enerji təhlükəsizliyinin gücləndirilməsi baxımından əhəmiyyəti qeyd olunub. Tərəflər Orta Dəhlizin potensialı və onun inkişafı istiqamətində gələcək əməkdaşlıq məsələlərini müzakirə ediblər”, – Gürcüstan hökumətinin məlumatında deyilib.

Görüşdə Gürcüstanın xarici işlər naziri Maka Boçorişvili iştirak edib.