Gürcüstanın Baş naziri İrakli Kobaxidze Azərbaycan Respublikasının Prezidenti İlham Əliyevlə görüşüb. Görüşdə Gürcüstan və Azərbaycan Respublikası arasındakı strateji tərəfdaşlığa, eləcə də müxtəlif sahələrdə əməkdaşlığın daha da dərinləşdirilməsi perspektivlərinə diqqət yetirilib.

İki ölkə arasında ticarət-iqtisadi əlaqələrin inkişafının müsbət dinamikası və bu kontekstdə iqtisadi əməkdaşlıq üzrə hökumətlərarası komissiyanın rolu vurğulanıb. Gürcüstan tərəfi yaxın gələcəkdə komissiyanın növbəti iclasına ev sahibliyi etməyə hazır olduğunu təsdiqləyib.

İki ölkə liderləri qlobal və regional geosiyasi çağırışları müzakirə ediblər və bir daha regionun davamlı və sabit inkişafı üçün sülhün vacibliyini vurğulayıblar.

Görüşdə həmçinin Gürcüstan və Azərbaycanın birgə həyata keçirdiyi regional əhəmiyyətli layihələr və onların əlaqəliliyin gücləndirilməsindəki rolu müzakirə olunub.