İrakli Kobaxidze bildirib ki, gürcü şərabı ölkənin kimliyinin ən mühüm simvollarından biridir və məhz bu torpaqda 8 min il əvvəl başlayan fasiləsiz şərabçılıq ənənəsi Gürcüstanın tarixini və mədəniyyətini əhəmiyyətli dərəcədə formalaşdırıb.
Baş nazir bu fikirləri Milli Şərab Gününə həsr olunmuş konfransda çıxışı zamanı səsləndirib.
Hökumət başçısının sözlərinə görə, şərab gürcü ənənələrinin və qonaqpərvərliyinin ayrılmaz hissəsidir. Gürcüstanın 525-dən çox endemik üzüm növünə malik olması isə ölkəni bu sahədə dünyanın aparıcı yerlərindən birinə çıxarır.
“Milli Şərab Gününə həsr olunmuş və dünya bazarında gürcü şərabının perspektivlərinin müzakirəsinə həsr edilən konfransın açılışında iştirak etmək imkanından məmnunam. Gürcü şərabı bizim kimliyimizin ən mühüm simvollarından biridir. 8 min il əvvəl məhz bu torpaqda böyük və fasiləsiz şərabçılıq ənənəsi yaranıb ki, bu da ölkəmizin tarixini və mədəniyyətini böyük ölçüdə müəyyənləşdirib. Şərab bizim ənənələrimizin və qonaqpərvərliyimizin ayrılmaz hissəsidir. Üzüm tənəyi lap əvvəldən milli dəyərə çevrilib və minilliklər boyu kimliyimizi müəyyən edib.
2017-ci ildə dünya elmi ictimaiyyəti rəsmi şəkildə Gürcüstanı şərab sivilizasiyasının beşiyi kimi tanıyıb. Qvevri üsulu ilə şərab hazırlanmasının gürcü ənənəvi metodu isə 2013-cü ildə UNESCO tərəfindən qeyri-maddi mədəni irs statusu alıb ki, bu da onun unikallığının təsdiqidir. 525-dən çox endemik növ Gürcüstanın dünyada aparıcı mövqelərdən birini tutmasına imkan verən zənginlikdir”, – deyə baş nazir bildirib.