Dövlət öz mövqeyindədir və heç kimə onu dinc və ya qeyri-dinc yolla devirməyə imkan verməyəcək, biz bu vədi mütləq yerinə yetirəcəyik, – Bu barədə Gürcüstanın Baş Naziri İrakli Kobaxidze jurnalistin, Paata Burçuladze və Levan Xabeişvilinin “sülh yolu ilə hakimiyyətin devrilməsi” ilə bağlı açıqlamalarına dair sualına cavab olaraq bildirib.

Kobaxidzenin dediyinə görə, bütün bunlar onların üzünə, əhval-ruhiyyəsinə və münasibətinə işarə edir.

“Adlar və soyadlar hər şeyi deyir, bu iki şəxsin danışığını necə ciddi qəbul etmək olar? Lakin bu, bir daha radikal müxalifətin simasını göstərir. Bütün bu illər ərzində onlar daim hakimiyyətin devrilməsi, inqilab barədə danışırlar. Nə olsun ki, alınmır, bütün bunlar yenə də onların üzünə, əhval-ruhiyyəsinə və münasibətinə işarə edir. Xarici agentlər belə hərəkət edirlər. Təbii ki, dövlət öz mövqeyindədir və heç kimə onu dinc və ya qeyri-dinc yolla devirməyə imkan verməyəcək. Necə ki, bütün bu illər ərzində ictimaiyyətə heç kimə bunu etməyə imkan verməyəcəyimizi vəd edirdik və sözümüzü yerinə yetirirdik, indi də eyni vədi veririk və bu vədi də mütləq yerinə yetirəcəyik”, – deyə baş nazir bildirib.