Axaltsixe şəhərində müasir standartlara uyğun idman kompleksinin tikintisi başa çatdı. Yeni tikilmiş çoxfunksiyalı kompleksə Gürcüstanın Baş naziri İrakli Kobaxidze hökumət üzvləri ilə birlikdə baxışdan keçirdi.

Hökumət rəhbəri idman kompleksinin infrastrukturu ilə tanış oldu və qeyd etdi ki, ölkə miqyasında çoxfunksiyalı idman mərkəzlərinin inkişafı hökumətin ən vacib prioritetlərindən biridir.

“Axaltsixe çoxfunksiyalı idman mərkəzi yaxın gələcəkdə axaltsixeliləri qəbul edəcək. Sağlam həyat tərzinin və idmanın inkişafını təşviq etmək baxımından bu çox vacibdir. Belə layihələrin ölkə miqyasında geniş şəkildə həyata keçirilməsi vacibdir”, – deyə İrakli Kobaxidze bildirib.

Axaltsixe idman kompleksi böyük və kiçik üzgüçülük hovuzlarını, həmçinin trenajor, ağır atletika, boks və güləş zallarını əhatə edir, bu da həm fərdi, həm də komanda idman növləri üçün geniş imkanlar yaradır.

İnfrastruktur naziri qeyd etdiyi kimi, hazırda idman kompleksinin Axaltsixe şəhər meriyasına verilməsi ilə bağlı prosedurlar davam etdirilir. Proses başa çatdıqdan sonra peşəkar komanda formalaşdırılacaq və çoxfunksiyalı mərkəz tam fəaliyyətə başlayacaq.

İdman kompleksini İnfrastruktur Nazirliyinin Bələdiyyə İnkişaf Fondu tikib. Layihə Asiya İnkişaf Bankının (ADB) dəstəyi və dövlətin birgə maliyyələşdirməsi ilə həyata keçirilib və dəyəri 25 milyon larini ötüb.