Gürcüstan İqtisadiyyat Nazirliyinin məlumatına görə, 2025-ci ilin oktyabr ayında Gürcüstan iqtisadiyyatı 6,0% artıb, 2025-ci ilin yanvar-oktyabr ayları üçün orta iqtisadi artım 7,6% olaraq müəyyən edilib.

Qurumun məlumatına görə, 2025-ci ilin oktyabr ayında ƏDV ödəyən müəssisələrin dövriyyəsi əvvəlki ilin müvafiq ayı ilə müqayisədə 7.0% artıb, yeni qeydiyyatdan keçmiş müəssisələrin sayı isə 6,075-ə çatıb.

“2025-ci ilin oktyabr ayında iqtisadi artıma əhəmiyyətli müsbət töhfə verən sahələr informasiya və kommunikasiya, nəqliyyat və anbarçılıq, səhiyyə, maliyyə və sığorta fəaliyyətləri, daşınmaz əmlakla bağlı fəaliyyətlər, emal sənayesi, inzibati və köməkçi xidmətlər, həmçinin incəsənət, əyləncə və istirahət sektorları olub. Yanvar-oktyabr aylarında yüksək iqtisadi artıma xarici ticarət istiqamətində müşahidə olunan müsbət tendensiyalar kömək edib.

2025-ci ilin yanvar-oktyabr aylarında ixrac 6.8% artıb və 5.8 milyard ABŞ dolları təşkil edib, yerli ixracın (təkrar ixrac istisna olmaqla) artımı isə 10 ayda 4.6%-ə çatıb.

2025-ci ilin yanvar-sentyabr aylarında səyahət (turizm) gəlirləri illik 5.1% artıb və rekord səviyyəyə çataraq 3.6 milyard ABŞ dolları təşkil edib.

2025-ci ilin noyabrında reytinq şirkəti Fitch tərəfindən reytinqin perspektivinin yaxşılaşdırılması Gürcüstan iqtisadiyyatının xarici şoklara qarşı dayanıqlılığını vurğulayır. Beynəlxalq Valyuta Fondunun proqnozuna görə, region və Avropa ölkələri arasında Gürcüstan orta müddətli dövrdə – 2025-2030-cu illərdə ən yüksək iqtisadi artımı əldə edəcək və orta hesabla 5.4%-ı təşkil edəcək”, – İqtisadiyyat Nazirliyinin yaydığı məlumatda qeyd edilib.