Gürcüstanın İqtisadiyyat və Davamlı İnkişaf nazirinin müavini Tamar İoseliani, ölkədə “Build With AI for Public Sector” adlı regional proqramı həyata keçirən “Google” korporasiyasının nümayəndələri ilə görüşüb.

Layihənin məqsədi dövlət sektorunda süni intellekt haqqında bilikləri dərinləşdirmək və məlumatlara əsaslanan idarəetməni inkişaf etdirməkdir.

Görüş zamanı “Google” nümayəndələri nazir müavinini regional proqramla tanış etdilər. Bu proqram çərçivəsində Google, Gürcüstanın İqtisadiyyat və Davamlı İnkişaf Nazirliyi ilə əməkdaşlıq edərək, Gürcüstanın dövlət sektoru nümayəndələri ilə işgüzar görüş keçirdi. İşgüzar görüşün iştirakçıları süni intellektin tətbiqi vasitəsilə ictimai idarəetmənin səmərəliliyinin və nəticəliliyinin artırılması sahəsində ən yaxşı beynəlxalq təcrübə ilə tanış oldu, həmçinin bu texnologiyaların tətbiqi ilə bağlı imkanlar və riskləri müzakirə etdi.

Nazir müavininin bildirdiyinə görə, Gürcüstan hökuməti ölkənin rəqəmsal transformasiyasını sürətləndirməyə, innovasiyaların təşviqinə və qlobal səviyyədə rəqabət qabiliyyətinin artırılmasına xidmət edən rəqəmsal layihə və proqramları uğurla həyata keçirir.

“Məqsədimiz Gürcüstanı yüksək tutumlu fiber-optik şəbəkələr və hipermiqyaslı məlumat mərkəzləri ilə Avropa və Asiyanı birləşdirən regional rəqəmsal mərkəz kimi yaratmaqdır,” – deyə Tamar İoseliani qeyd edib.

O həmçinin rəqəmsal savadlılığa investisiyaların davam etdirilməsinin, innovasiyaların təşviq edilməsinin və sübuta əsaslanan idarəetmənin daha da gücləndirilməsinin vacibliyini və bu istiqamətdə bu günkü tədbirin əhəmiyyətini vurğulayıb.

“Google” layihəsi dövlət qulluqçuları üçün bulud sistemləri, süni intellekt modulları, onlayn fırıldaqçılığa qarşı “Google”un qoruma sistemlərinin imkanları, onların əhəmiyyəti və istifadəsi barədə məlumatlılığın artırılmasını nəzərdə tutur. Həmçinin süni intellektdən istifadə zamanı böyük həcmdə məlumatların işlənməsini və “Google”un geointellekt imkanlarını əhatə edir ki, bu da Gürcüstanın dövlət sektorunun nümayəndələrinə peşəkar vəzifələrinin icrasında kömək edəcək.

Məlumatı Gürcüstanın İqtisadiyyat və Davamlı İnkişaf Nazirliyi yayır.