Hindistan Hərbi Hava Qüvvələrinə məxsus təyyarə qəzaya uğrayıb, beş nəfər həlak olub
Hindistan Hərbi Hava Qüvvələrinə məxsus təyyarənin qəzaya uğraması nəticəsində beş nəfər həlak olub. Xarici medianın məlumatına görə, An-32 nəqliyyat təyyarəsi Assam ştatının şimal-şərqində qəzaya uğrayıb.
Hindistan Hərbi Hava Qüvvələrinin məlumatına görə, təyyarə Corhat bölgəsində müntəzəm uçuş həyata keçirirdi. Hərbi Hava Qüvvələri istintaqa başladığını bildirib.
“Bu gün, təxminən saat 10:00-da, Hindistan Hərbi Hava Qüvvələrinə məxsus An-32 təyyarəsi Assam ştatının Corhat şəhərində planlaşdırılmış uçuş zamanı qəzaya uğrayıb. Qəza yerində istintaq aparılır. Hindistan Hərbi Hava Qüvvələri ilkin nəticələr bəlli olana qədər hər kəsi ehtimallardan çəkinməyə çağırır. Hərbi Hava Qüvvələri baş vermiş hadisədən dolayı dərin kədərini ifadə edir və bu ağır dəqiqələrdə həlak olanların ailələrinə dəstək olduğunu bildirir. Əlavə təfərrüatlar əldə edildikcə paylaşılacaq”, – deyə bəyanatda deyilib.