ABŞ-ın keçmiş dövlət katibi və veteran diplomat Henri Kissincer bildirir ki, Ukraynada sülh barədə danışıqların vaxtı çatır. O, bunun növbəti fəlakətli dünya müharibəsi təhlükəsini azaltmaq üçün lazım olduğunu bildirib. Kissincer bu barədə “Spectator” nəşrinə müsahibəsində açıqlayıb.

“Sülh prosesi hansı yolla olursa olsun, Ukraynanı NATO ilə əlaqələndirməlidir. Neytrallıq alternativinin artıq mənası yoxdur” -deyə Kissincer bildirib.

O bildirib ki, 2014-cü ildəki status-kvoya qayıtmağın mümkün olmadığı sübut olunarsa, Rusiyanın mənimsədiyi ərazilərdə beynəlxalq nəzarət altında referendumun keçirilməsi həll yolu ola bilər.

“Artıq yaranmış strateji dəyişikliklərə əsaslanmaq və danışıqlar yolu ilə sülhə nail olmaq üçün onları yeni struktura inteqrasiya etməyin vaxtı yaxınlaşır”-deyə Kissincer açıqlayır.

Bununla yanaşı, veteran amerikalı diplomat Rusiyanın parçalanması xəyallarının nüvə xaosuna səbəb olacağını hesab edir.

“Rusiyanın parçalanması və ya strateji siyasət qabiliyyətinin məhv edilməsi onun 11 saat qurşağını əhatə edən ərazisini mübahisəli vakuuma çevirə bilər. Onun mübahisəli cəmiyyətləri mübahisələri güc yolu ilə həll etməyə cəhd edə bilərlər. Digər ölkələr öz iddialarını güc yolu ilə genişləndirməyə cəhd edə bilərlər. Bütün bu təhlükələr Rusiyanın malik olduğu minlərlə nüvə silahı ilə daha da ağırlaşacaq, bu səbəbdən o, dünyanın iki ən böyük nüvə gücündən biridir”-deyə Kissincer bildirib.