Türkiyənin xarici işlər naziri Hakan Fidan Rusiya və Ukrayna liderlərinin görüşmək barədə razılığa gəldiyini bildirib.

Türkiyənin xarici işlər nazirinin izah etdiyi kimi, tərəflər “Vladimir Putin və Volodimir Zelenski arasında Türkiyədə görüşlə bağlı prinsipial razılığa gəliblər”, lakin o, görüşün nə vaxt keçiriləcəyini dəqiqləşdirməyib.

Onun dediyinə görə, İstanbulda keçirilən danışıqların üçüncü raundunda tərəflər konsensus əldə ediblər.

“Görüşdə liderlərin necə və hansı şərtlərlə görüşməli olduqları məsələləri müzakirə olunurdu. Türkiyədə liderlərin sammitinin keçirilməsi barədə prinsipial razılıq əldə olunub.

Biz bu məsələni daha ciddi müzakirə etməyə davam etdikcə, mən görüşə hazırlığı görürəm. Hesab edirəm ki, əgər eyni ruhda davam etsək, müvəqqəti bir həll ortaya çıxacaq. Hamı bu təklifə hazır deyil. Biz buna şərait yaratmağa çalışırıq”, – Fidan media ilə danışarkən qeyd edib.

İyulun 23-də İstanbulda keçirilən danışıqlarda iki ölkə liderlərinin avqustun sonunadək görüşünün təşkil edilməsi təşəbbüsü Ukrayna tərəfindən irəli sürüldü, lakin Kremlin mətbuat katibi Dmitri Peskov bunu az ehtimal edilən bir hal kimi qiymətləndirdi. Onun dediyinə görə, belə bir sammitin keçirilməsi yalnız sülh danışıqlarının sonunda mümkün ola bilər.