Gürcüstanda Ümumdünya Səhiyyə Təşkilatının (ÜST) standartlarına uyğun təcili tibbi yardım qrupu yaradılıb. Bu barədə Səhiyyə Nazirliyi məlumat yayır.

Qurumun məlumatına görə, qrupun hazırlığını qiymətləndirmək üçün Tbilisi dənizinin yaxınlığında yerləşən ərazidə EMT-1-in sahə simulyasiya təlimi keçirilib.

“Təlimin əsas məqsədi reaksiya sürətini, koordinasiyanı və resursların idarə olunmasının səmərəliliyini yoxlamaq olub.

Ssenarilər çərçivəsində kütləvi fəlakət vəziyyətləri işlənib hazırlanıb – bunlara daşqın, zəlzələ, torpaq sürüşməsi və texnogen qəzalara aid hallar daxildir. Zərərçəkənlərin triajı, təcili yardım göstərilməsi və xəstələrin nəqli həyata keçirilib.

Fövqəladə hallar zamanı sahə şəraitində fəaliyyət göstərən komanda həm ölkə daxilində, həm də zərurət yarandıqda ölkə hüdudlarından kənarda təcili tibbi yardım göstərir.

Təcili tibbi yardım (EMT) qrupuna daxil olanlar: həkimlər, paramediklər, tibb bacıları, logistika və texniki xidmət işçiləridir. Onlar hadisə yerinə çatdıqdan dərhal sonra sahə şəraitində təcili tipli xəstəxananı qurmağa başlayırlar və hər cür ağır xəstələrin qəbulunu həyata keçirirlər.

Nazirin bildirdiyinə görə, bu komandanın mövcudluğu ölkənin müxtəlif növ böhranlara operativ reaksiya verməyə hazırlığını əhəmiyyətli dərəcədə gücləndirir. Mixeil Sarcveladze Təcili Yardım komandasına yüksək peşəkarlığına və gündəlik fədakarlığına görə təşəkkür edib və onların fəaliyyəti həm fövqəladə vəziyyətlərin, həm də gündəlik tibbi çağırışların idarə olunması prosesində kritik əhəmiyyətə malik olduğunu qeyd edib.

Layihə Ümumdünya Səhiyyə Təşkilatı ilə əməkdaşlıq çərçivəsində həyata keçirilir. Təsdiqləmə uğurla başa çatdıqda, EMT-1 komandası beynəlxalq təsnifat alacaq və bu da onun qlobal səviyyədə fəaliyyət göstərməsinə imkan verəcək”, – Səhiyyə Nazirliyinin yaydığı məlumatda deyilib.