Tbilisidə Gürcüstan-Çin Ticarət-İqtisadi Əməkdaşlıq üzrə Birgə Komissiyasının 9-cu iclası keçirilib. Gürcüstanın baş nazirinin birinci müavini, iqtisadiyyat və davamlı inkişaf naziri Levan Davitaşvilinin və Çin Xalq Respublikasının kommersiya nazirinin müavini Lin Dzinin həmsədrliyi ilə keçirilən görüş çərçivəsində iki ölkə arasında ticarət-iqtisadi əlaqələrin ən mühüm məsələləri müzakirə olunub.

Komissiyanın iclasının gündəliyinə əsasən, tərəflər Gürcüstan və Çin arasında azad ticarətin dərinləşdirilməsi perspektivləri və investisiya əlaqələrinin, həmçinin nəqliyyat, logistika, enerji, informasiya texnologiyaları və innovasiyalar, turizm, kənd təsərrüfatı və digər sahələrdə əməkdaşlıq məsələlərini və onların dərinləşdirilməsi perspektivlərini müzakirə ediblər. Komissiya üzvləri iki ölkə arasında birbaşa uçuşlarla bağlı məsələləri də müzakirə ediblər. Həmçinin, müzakirə mövzularından biri də Orta Dəhlizin əhəmiyyəti və bu dəhlizin inkişafında Gürcüstanın rolu olub.

“Gürcüstan və Çin arasında azad ticarət sazişi ikitərəfli ticarət-iqtisadi əməkdaşlığı əhəmiyyətli dərəcədə gücləndirdi. Gürcüstan regionda Çinlə azad ticarət rejimi quran ilk ölkə oldu və bununla da Gürcüstanın ticarət tərəfdaşı və tranzit qovşağı kimi strateji əhəmiyyətini vurğulandı”, – Baş nazirin birinci müavini çıxışında qeyd edib.

İqtisadiyyat və davamlı inkişaf naziri Çin nümayəndə heyətinin üzvlərinə Gürcüstanın əsas iqtisadi göstəriciləri və investisiya mühiti, həmçinin iri nəqliyyat və infrastruktur layihələrinin gedişi barədə məlumat verib. O, vizasız rejimin mövcudluğunun Gürcüstan və Çin arasında tərəfdaşlığın daha da inkişafına, biznes əlaqələrinin və iqtisadi əməkdaşlığın möhkəmlənməsinə töhfə verdiyini vurğulayıb. Levan Davitaşvilinin məlumatına görə, 2024-cü ilin göstəricilərinə əsasən, ölkələr arasında ticarət dövriyyəsi əvvəlki ilin göstəriciləri ilə müqayisədə 17% artaraq 1,92 milyard ABŞ dolları təşkil edib. Ticarət dövriyyəsinə görə Çin Gürcüstanın ən böyük ticarət tərəfdaşları arasında 4-cü yerdə qərarlaşıb.

İclasdan sonra Levan Davitaşvili və Lin Dzi Gürcüstan-Çin Ticarət və İqtisadi Əməkdaşlıq üzrə Birgə Komissiyasının 9-cu iclasının protokolunu imzaladılar; Komissiya çərçivəsində gürcü balının Çin bazarına çıxarılmasına icazə də imzalanıb. Bununla yanaşı, quş ətinin Çin bazarına çıxarılması üçün protokol üzrə danışıqlar yaxın aylarda başa çatacaq. Bu, Gürcüstan üçün ilk dəfə olaraq Çin bazarına yüksək tələbat olan məhsulları ixrac etmək üçün əlavə imkan olacaq.

Levan Davitaşvili Çin nümayəndə heyətinin rəhbərini cari ilin 22-23 oktyabr tarixlərində keçiriləcək 5-ci “Tbilisi İpək Yolu” Forumuna dəvət edib.

Məlumatı Gürcüstanın İqtisadiyyat və Davamlı İnkişaf Nazirliyi yayır.