Azərbaycan Dəmir Yolları nümayəndə heyətinin Gürcüstana səfərinin sonunda dəmir yolu qurumlarının rəhbərləri arasında ikitərəfli görüş keçirilib.

Gürcüstan Dəmir Yollarının məlumatına görə, görüş zamanı tərəflər Gürcüstan və Azərbaycan arasında dəmir yolu sektorunda uzunmüddətli, uğurlu tərəfdaşlığı vurğulayıblar.

Onların məlumatına görə, Laşa Abaşidze və Rövşən Rüstəmov iki ölkə arasında dəmir yolu sektorunda əməkdaşlıq və onun daha da inkişaf etdirilməsi məsələlərini müzakirə ediblər.

“Yük dövriyyəsinin artırılması, rüsumların/çatdırılma şərtlərinin optimallaşdırılması və Bakı-Tbilisi-Qars xəttinin inkişaf perspektivləri – söhbət əsasən bu məsələlər ətrafında olub. Qeyd etmək lazımdır ki, Gürcüstan və Azərbaycanın tərəfdaş dəmir yolu şirkətləri tərəfindən birgə fəaliyyət üçün xüsusi fəaliyyət planı hazırlanıb ki, bu da yük dövriyyəsinin artırılmasına xidmət edir. Bununla yanaşı, bu, layihələrin və tədbirlərin qısa müddət ərzində həyata keçirilməsinə töhfə verəcək”, – Gürcüstan Dəmir Yollarının məlumatında deyilib.

Gürcüstan Dəmir Yollarının baş direktoru Laşa Abaşidzenin bildirdiyinə görə, Azərbaycan Dəmir Yolları nümayəndə heyətinin səfəri olduqca səmərəli olub.

“Həmkarlarımızı ölkəmizin dəmir yolu və liman infrastrukturu və onların gələcək potensialı, o cümlədən “Orta Dəhliz”in inkişafı kontekstində təqdim etdik. Obyektlərdə mövcud imkanları gördük, həmçinin iki liman arasında yeni blok-vaqon marşrutu açdıq. Azərbaycanla gələcəkdə də fəal əməkdaşlıq edəcəyik, o cümlədən logistika xidmətlərinin yaxşılaşdırılması istiqamətində. Birgə hazırlanmış iş planları sayəsində mövcud marşrutlarda daha çox yük cəlb edə biləcəyik”, – Laşa Abaşidze qeyd edib.