Gürcüstan Milli Bankı monetar siyasət dərəcəsini dəyişməz saxlayaraq 8,25 faiz səviyyəsində qoruyub
Gürcüstan Milli Bankının Monetar Siyasət Komitəsi uçot dərəcəsini dəyişməz saxlayıb – 8,25 faiz
Gürcüstan Milli Bankının Monetar Siyasət Komitəsi 2026-cı il iyulun 29-da keçirilən iclasda monetar siyasət dərəcəsini dəyişməz saxlamaq qərarına gəlib. Hazırda uçot dərəcəsi 8,25 faiz təşkil edir.
Milli Bankın məlumatına görə, 2026-cı ilin iyun ayında Gürcüstanda illik inflyasiya 5,8 faiz olub. Hədəf göstəricisindən yüksək olan inflyasiyanın əsas səbəbi yenə də enerji resurslarının qiymətlərinin artmasıdır.
Bank qeyd edir ki, Yaxın Şərqdə geosiyasi gərginliyin yenidən artması fonunda beynəlxalq neft bazarında qiymət dəyişkənliyi yüksəlib. Bununla belə, hazırkı bazar tendensiyaları göstərir ki, qiymətlər əvvəlki eskalasiya dövründə qeydə alınan səviyyədən aşağıdır. Eyni zamanda, münaqişənin uzanması enerji qiymətlərindən qaynaqlanan dolayı inflyasiya risklərini artırıb.
Milli Bankın məlumatına əsasən, uzunmüddətli inflyasiya proseslərini və gözləntiləri daha yaxşı əks etdirən baza inflyasiyası hədəf göstəriciyə yaxın olaraq qalır. Belə ki, iyunda ərzaq, enerji daşıyıcıları və tütün məhsulları nəzərə alınmadan hesablanan baza inflyasiya 3,2 faiz təşkil edib. Bununla yanaşı, xidmət sektorunda inflyasiya 4,1 faizə yüksəlib ki, bu da ikinci dərəcəli inflyasiya təsirlərinin güclənməsi riskinin hələ də diqqətdə saxlanıldığını göstərir.
Milli Bankın yenilənmiş əsas ssenarisinə görə, enerji resurslarının inflyasiyaya təsiri cari ildə əhəmiyyətli olaraq qalacaq. Bu amil nəzərə alınaraq, 2026-cı ildə orta illik inflyasiyanın 5,2 faiz olacağı gözlənilir. İlin ikinci yarısından etibarən inflyasiyanın azalacağı və orta müddətli dövrdə tədricən 3 faizlik hədəfə yaxınlaşacağı proqnozlaşdırılır.
Bildirilib ki, xarici şoklara baxmayaraq, Gürcüstanda iqtisadi aktivlik dayanıqlığını qoruyur. İlkin məlumatlara əsasən, 2026-cı ilin may ayında iqtisadi artım 6,4 faiz, ilin ilk beş ayında isə orta hesabla 7,8 faiz təşkil edib. Artımın əsas mənbəyi yüksək məhsuldarlıqlı və xidmət yönümlü sahələr olaraq qalır.
Milli Bank 2026-cı il üzrə iqtisadi artım proqnozunu dəyişməyərək 6,5 faiz səviyyəsində saxlayıb.
Komitə geosiyasi vəziyyəti və onun qlobal iqtisadiyyata təsirlərini əsas risklərdən biri kimi qiymətləndirib. İclasda həm yüksək, həm də aşağı inflyasiya ssenariləri müzakirə olunub.
Yüksək inflyasiya ssenarisinin reallaşacağı təqdirdə, enerji qiymətlərinin əlavə artması və bunun yanacaq, nəqliyyat xərcləri, eləcə də digər məhsul və xidmətlərin qiymətlərinə təsiri nəticəsində monetar siyasətin daha sərt saxlanılması tələb oluna bilər.
Digər tərəfdən, aşağı inflyasiya ssenarisində struktur dəyişiklikləri, yüksək məhsuldarlıqlı sektorların payının artması, güclü xarici mövqe və geosiyasi gərginliyin azalması nəticəsində inflyasiyanın hədəfə daha sürətlə yaxınlaşması mümkündür.
Milli Bankın Monetar Siyasət Komitəsi mövcud makroiqtisadi vəziyyəti, yenilənmiş proqnozları və riskləri nəzərə alaraq uçot dərəcəsini bu mərhələdə dəyişməz saxlamağı məqsədəuyğun hesab edib.
Bununla yanaşı, artan inflyasiya riskləri səbəbindən sərt monetar siyasət mövqeyinin daha uzun müddət qorunacağı bildirilib. Milli Bank xarici şokların Gürcüstan iqtisadiyyatına təsirini diqqətlə izləyir və inflyasiya riskləri, o cümlədən inflyasiya gözləntiləri güclənərsə, siyasəti əlavə sərtləşdirməyə hazır olduğunu açıqlayıb.
Milli Bankın məlumatına görə, Monetar Siyasət Komitəsinin növbəti iclası 2026-cı il sentyabrın 9-da keçiriləcək.