Bu il Gürcüstan Çində, Şanxayda Asiyada ən böyük turizm sərgilərindən biri olan ITB China-nın tərəfdaş ölkəsi olacaq.

Tərəfdaşlıq müqaviləsinin imzalanması ilə bağlı rəsmi mərasim Tbilisidə keçirildi. Tədbirdə ITB China-nın rəsmi nümayəndələri, səfirliklərin və Gürcüstanın turizm şirkətlərinin təmsilçiləri, həmçinin dəvət olunmuş qonaqlar iştirak edirdi.

ITB CHINA 2026 sərgisi Şanxayda 26-28 may tarixlərində keçiriləcək. Tərəfdaş ölkə statusu Gürcüstanın yüksək görünürlüğünü və müxtəlif növ fəaliyyətləri nəzərdə tutur.

ITB CHINA 2026-da Gürcüstanın sərgi sahəsinin eksklüziv brendinq imkanları olacaq, ölkənin loqosu sərginin rəsmi veb səhifəsində və bütün rəsmi rəqəmsal və çap nəşrlərində yerləşdiriləcək. Gürcüstanın tanıtım stendinə 400 kvadrat metrlik sahə həsr olunacaq və burada mədəni tamaşalar, qastronomiya və şərab üzrə master-klaslar və dequstasiyalar keçiriləcək. Sərgidə 70-ə yaxın gürcü şirkəti iştirak edəcək, təqdimatlar və işgüzar görüşlər təşkil olunacaq.

Gürcüstan ITB CHINA sərgisinin rəsmi açılış şam yeməyinə ev sahibliyi edəcək. Açılışda turizm sənayesinin 700-dən çox lideri, “buyer” və yüksək vəzifəli qonaqlar iştirak edəcək. Gürcü mədəniyyəti, folkloru, qastronomiya, musiqi proqramı və şərab dequstasiyası təqdim olunacaq. Sərginin açılış günündə lent rəsmi olaraq kəsiləcək və VIP tur Gürcüstan stendi ilə başlayacaq. Gürcüstan haqqında videolar Çin mediasında və rəqəmsal kanallarda yayımlanacaq.

Gürcüstanın ITB CHINA 2026 sərgisində tərəfdaş ölkə kimi təqdim olunması ölkənin Çin və Asiya ölkələrində nüfuzunun yüksəldilməsinə və daha çox turist cəlb etməsinə kömək edəcək. Qeyd etmək lazımdır ki, keçən il ITB CHINA 2025-ə ümumilikdə 21,000-ə yaxın ziyarətçi, 1,400-dən çox “buyer” və 85 ölkədən 700 iştirakçı qatılmışdı. Tədbir 75,000-dən çox biznes və 1,400-dən çox media nümayəndəsinə çıxış imkanı təmin edirdi. Bu il sərginin təşkilatçıları iştirakçıların sayının artmasını gözləyirlər.