Gürcüstan Hökumət Administrasiyasının rəhbəri Levan Jorjoliani Almaniyanın səfiri Peter Fişerlə görüşüb

21:25, 25.09.2025

Gürcüstan Hökumət Administrasiyasının rəhbəri Levan Jorjoliani Almaniya Federativ Respublikasının Gürcüstandakı fövqəladə və səlahiyyətli səfiri Peter Fişer ilə görüşüb.

Görüşdə iki ölkə arasında son dövrdəki münasibətlərin dinamikası müzakirə olunub. Qeyd olunub ki, Gürcüstan hökuməti iki ölkə arasında mövcud olan münasibətlər səviyyəsindən razı deyil və vəziyyətin dəyişəcəyinə ümid edir.

Söhbət zamanı diplomatın Gürcüstanın Xarici İşlər Nazirliyinə çağırılması məsələsinə toxunulub. Bu diplomatik tədbirin müvafiq ilkin şərtlərə əsaslandığı qeyd edilib. Hökumət administrasiyasının rəhbəri Gürcüstan hökumətinin tərəfdaş ölkələrlə əlaqələrə böyük önəm verdiyini və diplomatik nümayəndələrin fəaliyyətinin qarşılıqlı hörmətə əsaslanan əməkdaşlıq prinsiplərinə uyğun şəkildə davam edəcəyinə ümid etdiyini bildirib.

Görüş zamanı həmçinin Gürcüstanda qrantlar haqqında qanun müzakirə olunub. Almaniyanın səfiri Hökumət Administrasiyasının rəhbərindən xahiş edib ki, Gürcüstan hökuməti alman təşkilatları tərəfindən gürcü qeyri-hökumət təşkilatlarına verilən qrantların razılaşdırılması istiqamətində istisna hal tətbiq etsin. Levan Jorjoliani səfirə qrantların verilməsi üzrə razılıq alma prosedurunu izah edib və qeyd edib ki, qanun hər kəsə bərabər şəkildə tətbiq olunur, buna görə də Gürcüstan hökuməti diskriminasiyaedici yanaşmalara yol verə bilməz.

Məlumatı Gürcüstan hökumətinin administrasiyası yayır.

Müəllif - Nino Pashayeva

Siyasət