Gürcüstanın təhsil, elm və gənclər naziri Qivi Mikanadze Tbilisi məktəblərinin müəllimləri, valideynləri və məktəb icmasının nümayəndələri ilə görüş keçirib və onları ümumi təhsil sisteminin islahatının əsas istiqamətləri ilə tanış edib. Bu barədə Təhsil Nazirliyi məlumat yayır.

Qurumun məlumatına görə, Qivi Mikanadze ümumi təhsil sisteminin islahatı çərçivəsindəki yeniliklərdən danışıb və mövcud çağırışların aradan qaldırılması yollarını müzakirə edib.

“Görüş iştirakçıları onları maraqlandıran məsələlərlə bağlı suallar verib və nazirlə mövqelərini və fikirlərini bölüşüblər.

Tbilisi Dövlət Universitetində keçirilən görüşdə Gürcüstanın təhsil, elm və gənclər nazirinin müavinləri Tamar Maxaraşvili və Zviad Qabisonia, parlament üzvü İrma Zavradaşvili və TSU rektoru Caba Samuşia iştirak ediblər.

Müəllimlər, valideynlər, məktəb direktorları və resurs mərkəzinin əməkdaşları ilə oxşar görüşlər ölkənin bütün bölgələrində keçirilib. Bunun məqsədi islahat konsepsiyasının müzakirəsi prosesində məktəb ictimaiyyətinin iştirakını təmin etmək idi.

Ümumi Təhsil Sisteminin İslahatı üzrə Milli Konsepsiya Sənədi yaxın gələcəkdə təsdiq üçün Gürcüstan hökumətinə təqdim ediləcək”, – Təhsil Nazirliyinin yaydığı məlumatda deyilib.