Qitanas Nauseda – Avropa ölkələri NATO xərclərinin beş faizlik hədəfini yerinə yetirə bilməsələr, alyans iki və ya üç hissəyə bölünəcək

Avropa ölkələri NATO xərclərinin beş faizlik hədəfini yerinə yetirə bilməsələr, alyans “iki və ya üç” hissəyə bölünəcək, – bu barədə Litva Prezidenti Qitanas Nauseda bildirib.

“Bəzi ölkələrin daha çox iş görməyə çalışaraq qarşıdakı illərdə bu məqsədə çatması, digər ölkələrdə isə göstəricinin, məsələn, 2% və ya 2,5% səviyyəsində qalması çox mübahisəli və ziddiyyətli vəziyyət yaradacaq. Bu, alyansı təbii olaraq iki və ya üç hissəyə böləcək və belə bir hal alyans daxilindəki kollektiv müdafiə ruhu, eləcə də həmrəyliyimiz üçün heç də yaxşı deyil”, – deyə Litva prezidenti qeyd edib.

NATO müttəfiqləri, İspaniya istisna olmaqla, ötən il Haaqada keçirilən sammitdə 2035-ci ilə qədər müdafiəyə ÜDM-in 5 faizini xərcləmək barədə razılığa gəliblər. Latviya, Litva və Estoniya Avropanın iqtisadi göstəriciləri ilə müqayisədə müdafiəyə ən çox xərc çəkən ölkələr sırasındadır. Onların liderləri gələn həftə Ankarada planlaşdırılan NATO sammiti öncəsi mövqelərini razılaşdırmaq üçün Berlində Kansler Fridrix Merts ilə görüşüblər.