Qeka Qeladze Daşkənddə Özbəkistanın Daxili İşlər Naziri ilə görüşüb
Gürcüstanın Daxili İşlər Naziri Qeka Qeladze nümayəndə heyəti ilə birlikdə Özbəkistan Respublikasında rəsmi səfərdədir. Gürcü nümayəndə heyətinə Özbəkistan Respublikasının Daxili İşlər Naziri Əziz Taşpulatov ev sahibliyi edir.
Səfər çərçivəsində Qeka Qeladze ilə özbək həmkarı arasında ikitərəfli görüş keçirilib. Görüşdə tərəflər iki ölkənin hüquq-mühafizə orqanları arasında əməkdaşlığın əsas istiqamətlərini müzakirə ediblər. Bunların arasında cinayətkarlığa qarşı mübarizədə tərəfdaşlığın genişləndirilməsi və möhkəmləndirilməsinə xüsusi diqqət yetirilib.
Görüş çərçivəsində iki ölkənin daxili işlər nazirləri həmçinin qurumlar arasında əməkdaşlıq haqqında saziş imzalayıblar. Qeyd olunan sazişin əsas məqsədi tərəflər arasında cinayətlərin qarşısının alınması, aşkar edilməsi, dayandırılması və istintaqı sahələrində ikitərəfli əməkdaşlığın gücləndirilməsidir.
Görüşün sonunda Qeka Qeladze özbək həmkarına səmimi qonaqpərvərliyə görə təşəkkür edib və onu Gürcüstana səfərə dəvət edib.