Qazaxıstanda yeni konstitusiyanın qəbul edilməsi üçün referendum keçirilir. Ölkənin yeni konstitusiya layihəsi hazırda qüvvədə olan Ali Qanunun mətnində 40%-lik dəyişiklik edilməsini nəzərdə tutur.

Yeniliklərin əsas hissəsi, yəni 70%-i konstitusiyanın hakimiyyət qolları arasında münasibətlərə aid maddələrini əhatə edir.

Bu baxımdan əsas dəyişikliklərdən biri ölkə parlamenti ilə bağlıdır, bu dəyişikliyə əsasən parlament iki palatalı deyil, birpalatalı olacaq. Deputatlar 5 il müddətinə partiya siyahıları ilə seçiləcəklər. Hazırda ölkədə qüvvədə olan qarışıq seçki sistemi ləğv ediləcək.

Həmçinin, dəyişikliklər yeni məsləhətçi orqanın yaradılmasını nəzərdə tutur, bu orqan qanunvericilik təşəbbüsləri irəli sürmək hüququna malik olacaq. Xalq Şurasının üzvlərini prezident təyin edəcək.

Bundan əlavə, beynəlxalq forumlarda ölkənin maraqlarını təmsil edəcək vitse-prezident vəzifəsi bərpa olunacaq. Vitse-prezidentin namizədliyi də ölkənin qanunverici orqanı tərəfindən təsdiqlənməsi üçün prezident tərəfindən təqdim ediləcək.

Yeni konstitusiya həmçinin parlamentin ölkə prezidentini impiçment elan edilməsi ehtimalını da nəzərdə tutur ki, bu da Qazaxıstanın hazırkı Ali Qanununa əsasən mümkün deyil. Lakin impiçment yalnız ölkənin Konstitusiya Məhkəməsinin razılığı ilə həyata keçiriləcək.

Konstitusiyanın yenilənmiş mətni həmçinin ölkə konstitusiyasının beynəlxalq təşkilatların və onların orqanlarının qərarlarından qeyd-şərtsiz üstünlüyünü nəzərdə tutur. Həmçinin, yeni konstitusiyaya əsasən, yalnız kişi ilə qadının birlikdə olması nikah kimi elan ediləcək. Ali Qanuna ediləcək düzəlişlər, nümayişlər ictimai asayişi və ya əxlaq üçün təhlükə yaratdığı halda, etiraz aksiyalarının keçirilməsinə məhdudiyyətlər qoyulmasını nəzərdə tutur.

Qazaxıstan qanunvericiliyi ilə, qeydiyyatdan keçmiş seçicilərin yarısından çoxu iştirak edərsə, referendum baş tutacaq. Nəticələr yeddi gün ərzində dərc olunmalıdır.