“Gallup” təşkilatının sorğusuna görə, ukraynalıların 66%-i hesab edir ki, müharibə danışıqlar yolu ilə mümkün qədər tez başa çatmalıdır

Ukraynalıların əksəriyyəti müharibəni davam etdirməkdənsə, danışıqlar yolu ilə bitməsinin tərəfdarıdır, – bu barədə “Gallup” təşkilatının sorğusunda qeyd olunur.

Tədqiqata görə, sorğuda iştirak edən ukraynalıların 24%-i Ukraynanın qələbə qazanana qədər mübarizəni davam etdirməli olduğunu düşünür, 66%-i isə hesab edir ki, ölkə müharibəni danışıqlar yolu ilə mümkün qədər tez dayandırmağa çalışmalıdır.

Sorğuya əsasən, bu göstəricilər təxminən 2025-ci ilin məlumatları ilə eynidir və 2022-ci ildəki vəziyyətlə müqayisədə demək olar ki, tamamilə əks mənzərəni ortaya qoyur – münaqişənin başladığı ilk aylarda sorğuda iştirak edənlərin 73%-i mübarizənin davam etdirilməsini dəstəkləyirdi, 22%-i isə tez bir zamanda danışıqların aparılmasının tərəfdarı idi.

Sorğu göstərir ki, danışıqların aparılmasına dəstək xüsusilə Ukraynanın şərqində yüksəkdir, burada sorğuda iştirak edənlərin 63%-i müharibənin mümkün qədər tez başa çatmasını dəstəkləyir.

Bununla yanaşı, sorğuya görə, ukraynalıların əksəriyyəti hərbi əməliyyatların yaxın gələcəkdə başa çatması perspektivinə şübhə ilə yanaşır. Sorğuda iştirak edənlərin 5%-i bunun “çox ehtimal olunduğunu”, 18%-i “müəyyən qədər ehtimal olunduğunu” düşünür, 36%-i isə bunun “çox az ehtimal olunduğunu”, 34%-i isə “müəyyən qədər az ehtimal olunduğunu” hesab edir.

“Gallup” sorğusuna görə, ukraynalılar arasında ABŞ rəhbərliyinə olan inam azalmaqda davam edir. Sorğuda iştirak edənlərin yalnız 7%-i ABŞ rəhbərliyini müsbət, 79%-i isə mənfi qiymətləndirir. Bu göstərici 2025-ci il ilə müqayisədə 9 faiz bəndi azalıb.

Sorğu müəllifləri qeyd edirlər ki, 2022-ci il ilə müqayisədə Ukraynada ABŞ-a qarşı müsbət münasibət 59 faiz bəndi azalıb. Onların qiymətləndirməsinə görə, son iki onillik ərzində 140-dan çox ölkədə aparılan tədqiqatlar əsasında, ABŞ-a qarşı münasibətdə bu cür kəskin azalma heç bir digər ölkədə və heç bir beşillik dövrdə qeydə alınmayıb.

Sorğu həmçinin onu göstərib ki, ukraynalıların 30%-nin fikrincə, ölkə növbəti onillik ərzində NATO-ya üzv olacaq. Bu göstərici ötən ilin göstəricisi (32%) ilə demək olar ki, eynidir. Bununla yanaşı, sorğuda iştirak edənlərin demək olar ki, yarısı (49%-i) Ukraynanın növbəti on il ərzində Avropa İttifaqına üzv olacağını düşünür.