Fransanın Reyms şəhərində elektrik skuterin səbəb olduğu yanğın nəticəsində dörd nəfər həlak olub. Bu barədə Fransa mediası məlumat yayır.

Medianın məlumatına görə, yanğın on mərtəbəli binanın dördüncü mərtəbəsindəki mənzildə baş verib. Mənzildə 34 yaşlı kişi və 13 və 15 yaşlı yeniyetmələr yaşayırdı. Azyaşlı oğlan yanğından xilas olmaq üçün dördüncü mərtəbənin pəncərəsindən tullanaraq dünyasını dəyişib. Mənzildə tapılan yanmış cəsədin onun böyük qardaşı olduğu ehtimal edilir, ciddi yanıqlar alan ögey atası isə sağ qalıb.

Yanğının digər iki qurbanı isə yuxarı mərtəbələrdə yaşayan 87 yaşlı qadın və onun 59 yaşlı oğlu olub və onlar boğularaq həlak olublar. Daha bir nəfər zəhərlənmə və yanıq xəsarətləri alaraq ağır yaralanıb, 26 nəfər isə əsasən tüstüdən zəhərlənmədən yüngül bədən xəsarətləri alıb.

Yayılan məlumata görə, gecə yarısından sonra başlayan yanğın “son dərəcə güclü” olub və təxminən saat 03:45-ə qədər söndürülə bilməyib. Reyms prokuroru Fransua Şnayder bildirib ki, bu tip elementlərin törətdiyi yanğınları söndürmək olduqca çətindir, çünki elementlər sürətli yanma zamanı enerjini öz-özünə saxlamağa və yanğının yayılmasına kömək edir.