Fransa, Almaniya və Birləşmiş Krallıq İran tərəfindən Rusiyaya ballistik raketlərin verilməsini “Avropanın təhlükəsizliyi üçün birbaşa təhdid” adlandırırlar

 
Fransa, Almaniya və Birləşmiş Krallıq İran tərəfindən Rusiyaya ballistik raketlərin verilməsini “Avropanın təhlükəsizliyi üçün birbaşa təhdid” adlandırırlar. “The Guardian”ın yazdığı kimi, bu məsələ ilə əlaqədar Fransa, Almaniya və Birləşmiş Krallıq birgə bəyanat yayıblar.

Üç ölkə İran tərəfindən Rusiyaya ballistik raketlərin verilməsini pisləyir və İranla ikitərəfli hava xidmətləri müqavilələrini ləğv etmək üçün təcili addımlar atacaqlarını, İranın hüquqi və fiziki şəxslərinə qarşı sanksiyalar tətbiq edəcəklərini bildirir.

“Fransa, Almaniya və Birləşmiş Krallığın hökumətləri İran tərəfindən ballistik raketlərin ixracını və Rusiya tərəfindən alınmasını kəskin şəkildə pisləyirlər. İranın hərbi dəstəyi Rusiyanın Ukraynaya qarşı təcavüzkar müharibəsinin daha da genişlənməsidir və İran raketlərinin Avropa ərazilərinə düşməsinə səbəb olacaq, bu da Ukrayna xalqının iztirablarını artıracaq. Bu hərəkət İran, eləcə də Rusiya tərəfindən eskalasiyadır və Avropanın təhlükəsizliyi üçün birbaşa təhdiddir. Raketin verilməsi baş verərsə, İrana qarşı yeni və mühüm tədbirlər görəcəyimizi şəxsi söhbətlərdə və açıq şəkildə də bildirdik. İndi bizim İranın bu hərəkəti həyata keçirdiyinə dair sübutumuz var. İranla ikitərəfli hava xidmətləri müqavilələrini ləğv etmək üçün təcili addımlar atacağıq. Bundan başqa, İranın ballistik raket proqramı, ballistik raketlər və digər silahların Rusiyaya verilməsi ilə əlaqəli mühüm hüquqi və fiziki şəxslərə qarşı sanksiyalar tətbiq edəcəyik. Biz həmçinin İranın dövlət aviaşirkətinə qarşı sanksiyaların tətbiqi üzərində işləyəcəyik” – Almaniya, Fransa və Birləşmiş Krallığın hakimiyyətlərinin birgə bəyanatında deyilir.

Üç ölkə İranı Ukrayna ilə müharibədə Rusiyaya istənilən dəstəyi dərhal dayandırmağa və ballistik raketlərin inkişaf etdirilməsini və ixracını dayandırmağa çağırır.

Məlumat üçün bildirək ki, bundan əvvəl ABŞ dövlət katibi İranın Rusiyaya ballistik raketlər verdiyini təsdiqləyib, bu səbəbdən də Vaşinqton İrana qarşı sanksiyalar tətbiq edəcək.