Fəlakət nəticəsində Xaraqauli bələdiyyəsinin bir neçə kəndində problemlər yaranıb

Təbii fəlakət nəticəsində Xaraqauli bələdiyyəsinin bir neçə kəndində problemlər yaranıb. Güclü yağışın səbəb olduğu sel suları kəndlərin mərkəzi və məhəllədaxili yollarına daş, çınqıl və torpaq kütləsi gətirib, bu səbəbdən bəzi sahələrdə hərəkət çətinləşib. Bu barədə bələdiyyə meriyası məlumat yayır.

Onların məlumatına görə, Xaraqauli bələdiyyəsinin meri Koba Lursmanaşvili səhər saatlarından etibarən merin inzibati ərazi dairələri üzrə nümayəndələri ilə daimi əlaqədədir və təbii fəlakət nəticəsində yaranmış vəziyyətə nəzarət edir.

“Merin tapşırığı ilə Xidari kəndində təmizlik işlərinə merin müavini Davit Devdariani, İnfrastruktur və Abadlıq Xidmətinin rəhbəri Petre Şarikadze və müvafiq xidmətlərin nümayəndələri ilə birlikdə rəhbərlik edir.

Bələdiyyə tərəfindən kirayələnmiş xüsusi texnika Xidari kəndində işləyir. Güclü yağış nəticəsində yola tökülən daş-çınqıl və torpaq kütləsindən mərkəzi yol artıq təmizlənib və hərəkət bərpa olunub.

Xidari kəndində işlər başa çatdıqdan sonra, texnika fəaliyyətini güclü yağıntı nəticəsində yol infrastrukturu zərər görmüş Sakarikedi kəndində davam etdirəcək.
Bələdiyyə xidmətləri və müvafiq texnika tam səfərbər vəziyyətdə qalmaqdadır. İşlər təbii fəlakət nəticəsində yollarda hərəkət problemi yaranmış bütün məkanlarda davam etdiriləcək.”, -Xaraqauli Bələdiyyəsi Meriyasının yaydığı məlumatda deyilib.