Bu gün Estoniya Xarici İşlər Nazirliyi Gürcüstanın səfiri Zurab Xamaşuridzeni Gürcüstan vətəndaşlarına, müxalifət liderlərinə və jurnalistlərə qarşı zorakılığı və Gürcüstanın hakim partiyasının Estoniya ilə bağlı bugünkü düşmənçilik bəyanatını müzakirə etmək üçün çağırıb, – bu barədə Estoniya Xarici İşlər Nazirliyinin məlumatında qeyd olunub.

“Avtoritar hakimiyyətin və Gürcüstanın parlament sədrinin bugünkü bəyanatları qəbuledilməzdir, düşmənçilik və yalanlarla doludur. Təəssüf ki, Estoniyanın suverenliyini, ərazi bütövlüyünü və Avropaya doğru irəliləyişini 30 ilə yaxındır ki dəstəklədiyi ölkənin nümayəndələri Estoniyanın suverenliyinə yönəlik düşmənçilik ritorikası aparırlar və bununla da Rusiyanın fikirlərini təkrarlayırlar”, – deyə Marqus Tsahkna bildirib.

Estoniya Xarici İşlər Nazirliyindən verilən məlumata əsasən, səfirlə görüş zamanı söhbətdə Gürcüstanda keçirilən parlament seçkiləri, ondan əvvəlki və sonrakı dövrə toxunulub.

“Beynəlxalq seçki monitorinq təşkilatları irimiqyaslı qanun pozuntuları faktını təsdiqləyib və Estoniya hökuməti öz mövqeyini bildirib. Səfirlə görüşdə qeyd olunub ki, Gürcüstanda küçələrdə etiraz aksiyalarının qəddarca dağıdılması qəbuledilməzdir və insan haqlarını pozur”, – Estoniya Xarici İşlər Nazirliyinin məlumatında deyilib.

“Estoniya buna dözə bilməz. Zorakılığa görə məsuliyyət daşıyan 25 siyasətçi və yüksək vəzifəli məmura qarşı müvafiq bəyanatlar verdik və ölkəyə giriş qadağası şəklində sanksiyalar tətbiq etdik. Hakim partiyanın Gürcüstanın Avropaya inteqrasiyasını dayandırmaq qərarı xalqı şoka saldı və onları öz baxışlarını ifadə etmək üçün küçələrə çıxmağa məcbur etdi və onların buna haqqı var”, – Estoniyanın xarici işlər nazirinin bəyanatında qeyd olunub.