Fransa prezidenti Emmanuel Makron Avropa İttifaqı ilə ABŞ arasında imzalanan ticarət sazişini tənqid edir.

Avropa İttifaqı-ABŞ ticarət razılaşmasına əsasən, Avropa İttifaqının ABŞ-a ixrac etdiyi demək olar ki, bütün məhsullarına 15 faizlik rüsum tətbiq olunacaq.

“Azad olmaq üçün qorxu yaratmalısan. Onlar bizdən kifayət qədər qorxmurdular. Fransa həmişə qəti və tələbkar mövqe tuturdu. O belə davam edəcək. Bu, tarixin sonu deyil və biz bununla dayanmayacağıq. Bu, davam edəcək danışıqlar prosesində ilk addımdır”- Emmanuel Makron bildirib.

Eyni zamanda, Fransa prezidenti deyib ki, razılaşmanın üstünlüyü qısamüddətli perspektivdə şəffaflığı və proqnozlaşdırıla bilməsini təmin etməkdir.

“Bu, Fransa və Avropanın maraqlarını qoruyur: bəzi əsas ixrac sahələrimiz, o cümlədən aviasiya üçün gömrük rüsumlarından azad olunma. Kənd təsərrüfatı sektorlarımız üçün heç bir güzəşt yoxdur, tənzimləyici müstəqilliyimizə, sağlamlıq və ətraf mühit standartlarımıza qarşı heç bir təhdid yoxdur. Komissiya bunu təmin etdi,” – deyə Emmanuel Makron qeyd edib.