“Dozhd” teleşirkətinin keçmiş aparıcısı Aleksey Korostelevin Latviyaya girişinə qadağa qoyulub

Rus “Dozhd” teleşirkətinin keçmiş aparıcısı Aleksey Korostelevin Latviyaya girişinə qadağa qoyulub. Bu barədə “DELFI ” nəşri məlumat yayır.

Media tərəfindən verilən məlumatda Korostelevin bu ölkənin Milli Təhlükəsizlik Xidmətinin tələbi əsasında, Latviyanın daxili işlər nazirinin qərarı ilə qara siyahıya salındığı deyilir.

“DELFI ”nin yazdığı kimi, Korostelev Gürcüstanda işləyib. Onun Latviya vizası və yaşayış hüququ yoxdur, bu səbəbdən Latviya hakimiyyəti onu məsuliyyətə cəlb edə bilməz.

Media tərəfindən verilən məlumatda bildirilir ki, rus jurnalist Latviyaya giriş qadağası ilə bağlı məhkəməyə müraciət edə bilər.

Dekabrın 1-də “Dozhd”un aparıcısı televiziya ilə tamaşaçılara müraciət edərək, onları Rusiyada davam edən səfərbərlik prosesində mümkün pozuntular barədə teleşirkətə məlumat göndərməyə çağırıb.

“Ümid edirik ki, bir çox hərbi qulluqçuya, məsələn, cəbhədə avadanlıq və əsas ehtiyaclarla kömək edə bilmişik” – deyə Korostelev bildirib. Bundan sonra Latviyanın Təhlükəsizlik Xidməti “Dozhd”un Rusiya ordusuna mümkün yardımı məsələsi ilə bağlı istintaqa başlayıb. Dekabrın 6-da isə Latviyanın tənzimləyicisi rus teleşirkətinin lisenziyasını ləğv edib.