Axalkalaki və Marneulidə Gürcüstanın Müstəqillik Gününün təntənəli şəkildə qeyd olunmasına hazırlaşırlar.

Dövlət nazirinin aparatı bu il də Müstəqillik Günü münasibətilə keçirilən tədbirlərə ənənəvi olaraq Kvemo Kartli və Samtsxe-Cavaxeti bölgələrində, Marneuli və Axalkalaki şəhərlərində ev sahibliyi edir.

“Həmişə olduğu kimi, planlaşdırma prosesində bu bölgələrin və konkret bələdiyyələrin etnik, dil və mədəni xüsusiyyətlərini nəzərə alırıq; buna görə də tədbirlərimiz çox spesifikdir, çünki biz birliyə və dövlət dilini bilməyin vacibliyinə diqqət yetiririk – bu, bizim rəhbər tutduğumuz əsas xəttdir. Hər iki şəhərdə çox maraqlı, genişmiqyaslı və rəngarəng tədbirlərimiz olacaq; bura mədəni, əyləncəli və maarifləndirici məkanlar, ustad dərsləri, musiqili, xoreoqrafik və teatr tamaşaları daxildir. Əlbəttə ki, tədbirə qatılan vətəndaşlar yerindəcə Müdafiə Qüvvələrinin hərbi texnikası, silah və avadanlıqlarının sərgisi ilə tanış olmaq imkanı əldə edəcəklər. Hər iki şəhərdəki ümumi ruh yüksəkliyi ondan ibarətdir ki, yaşından, dini inancından və ya etnik mənsubiyyətindən asılı olmayaraq hər bir qonaq özünü bu günün tamhüquqlu iştirakçısı kimi hiss etsin, 26 Mayın nə dərəcədə böyük əhəmiyyət kəsb etdiyini və Müstəqillik Gününün ümumxalq səviyyəsində qeyd olunmasının nə dərəcədə mühüm məna daşıdığını tam dərk etsin.

Bu il biz gürcüdilli fəaliyyətlərə xüsusi diqqət ayırdıq, çünki etnik azlıqların sıx məskunlaşdığı bələdiyyələrdə gürcü dilinin bilik səviyyəsi ilə bağlı bu gün əldə olunan irəliləyiş tədbirlərin bütün komponentlərində nəzərə alınıb. Demək istəyirəm ki, ümumilikdə gürcü dilinin öyrənilməsinə maraq çox yüksəkdir; mühit və qurulan konstruksiyalar o qədər gözəl və zövqlə tərtib olunub ki, bu, əhali üçün həqiqətən daha da motivasiyaedici olacaq. Hər iki şəhərdə əsl xalq bayramı təşkil olunacaq və ən əsası, edilən hər şey hər bir qonağın sevgini hiss etməsi və bu regionlardakı əhalinin Gürcüstan sevgisi ilə birliyini görməsi üçün edilir.

Saat 17:10-da bütün ölkə miqyasında dövlət himni təntənəli şəkildə ifa olunacaq. Marneulidə, tarixdə ilk dəfə olaraq, himni etnik azərbaycanlı və gürcü səslərdən ibarət xor birlikdə ifa edəcək; yerli, etnik azərbaycanlı müğənninin dövlət himninin ifasına ilk dəfə cəlb olunması çox vacibdir və bu, təkcə musiqi baxımından deyil, həm də vizual olaraq həqiqətən möhtəşəm şəkildə tərtib ediləcək.

Tədbirlər saat 11:00-da başlayacaq və axşam qala-konsertlərlə başa çatacaq, hər kəsə tanış olan kompozisiyaları tanınmış müğənnilər və ansambllar ifa edəcəklər”, – bu barədə Barışıq və vətəndaş bərabərliyi məsələləri üzrə Dövlət Nazirinin birinci müavini Lia Qiqauri bildirib.

Dövlət Naziri Aparatı məlumat yayır.